Ўзбекистон Fitch Ratings агентлиги рейтингида ўзининг суверен кредит даражасида сақлаб қолди
10 апрель куни Fitch Ratings халқаро рейтинг агентлиги Ўзбекистоннинг суверен кредит рейтинги бўйича навбатдаги ҳисоботини эълон қилди. Унга кўра, Ўзбекистоннинг суверен кредит рейтинги «BB-» («Барқарор») даражасида сақлаб қолинди.
Fitch Ratings’нинг таъкидлашича, COVID-19 пандемияси туфайли юзага келган глобал инқироз шароитларида Ўзбекистон рейтингининг сақлаб қолинишига асосий омиллар мамлакатда мустаҳкам ташқи ва фискал захираларнинг мавжудлиги, диверсификацияланган товарлар экспорти базаси ҳамда ташқи молиявий манбалардан фойдаланиш имкониятлари ҳисобланади.
Fitch Ratings прогноз қилишича, Ўзбекистон иқтисодиёти 2020 йилда 2 фоизга ўсади. Келгуси йилда бу суръат 6,8 фоизга етади. Бунда ҳозирдаги инқирозга қарши чоралар, ёш ишчи кучи, юқори инвестиция, ислоҳотларнинг давом эттирилиши ҳамда асосий ҳамкорларнинг (Россия, Хитой) тезроқ оёққа туриб олиши муҳим рол ўйнайди.
Давлат қарзлари ЯИМга нисбатан 34,3 фоизга етади, 2019 йилда бу кўрсаткич 28,5 фоиз эди. Ўзбекистон тикланиш ва тараққиёт жамғармасининг салкам 20 миллард долларлик активлари, жумладан, халқаро захираларнинг 37,7 фоиз — 11 миллард доллари пул маблағларидан, 57 фоизи Марказий банкнинг монетар олтиндан иборат эканлиги ҳам ташқи қарз ва фискал сиёсатнинг мослашувчанлигини таъминлайди.
Консолидацияланган бюджет дефицити 2020 йилда ЯИМга нисбатан 4,2 фоизга етиши мумкин. Fitch Ratings ислоҳотлардан четлашиш, макроиқтисодий мувозанатнинг бузилиши ҳамда макроиқтисодий барқарорлик учун хатарларни оширадиган номақбул чоралар, коронавирус пандемиясининг ЯИМнинг ўрта муддатли ўсиши ёки давлат молиясига ўта кучли салбий таъсир кўрсатиши ҳамда валюта захираларининг пасайиши ёки ташқи қарз мажбуриятларининг кескин ўсишини Ўзбекистон рейтингига салбий таъсир кўрсатувчи омиллар сифатида кўрсатиб ўтган.
Маълумот учун, COVID-19 пандемиясининг иқтисодиётга салбий таъсири туфайли агентлик бир неча суверен кредит рейтингларни ёки прогнозларни пасайтирди. Ўтган ҳафтанинг ўзида, Жанубий Африка Республикаси, Колумбия, Уммон ҳамда Нигериянинг рейтинглари пасайтирилди.
Эслатиб ўтамиз, 2019 йилнинг ёзида нуфузли халқаро рейтинг агентликларидан бири Fitch Ratings Тошкентга илк бор барқарор прогонозли «BB-» суверен кредит рейтингини тақдим этган эди.
