Сурункали уйқучанлик ҳаётнинг барча жабҳаларига таъсир ўтказмай қолмайди: ишдаги топшириқлар вақтида бажарилмайди, уй юмушларига, дўстлар билан ҳордиқ чиқаришга мадор етмайди. Карантин вақтида уйқуга берилиш авжига чиққанига ишончимиз комил. Harper’s Bazaar нашри кўпчиликни қийнайдиган ушбу муаммога ечим бўладиган тавсиялар билан бўлишди.
Меъёрдан кам ухламанг
Айтилавериб сийқаси чиқиб кетган факт: инсон бир суткада 7 ёки 8 соат ухлаши кераклиги ҳақида яхши биламиз, лекин амал қилишга келганда жиддий қарамаймиз. Шунчалик бандлигимиздан вақтимизни уйқуга сарфлашга кўзимиз қиймайди. Бироқ бир нарсани ёдда тутиш керак, чала ухлаб ишларни, вазифаларни ҳам чала қолдиргандан кўра тиниқиб ухлаб, ҳаммасини ўз вақтида дўндирган яхши.
Каравот фақат ухлаш учун
Каравотда фильм кўриш, китоб ўқиш ва ишлашни бас қилинг. Психологлар бир овоздан каравотни фақатгина ухлаш учун эканини таъкидлайди. Уларнинг айтишига қараганда, уйқу ва иш учун бир жойдан фойдаланиш оқибатида дам олиш ва тетиклик ўртасидаги психологик чегара бузилади. Қарабсизки, на ишда самара бўлади, на уйқуда.
Барвақт туринг
Ҳар тонг бир вақтда уйғонишга одатланинг. Бу ўз-ўзидан кечаси эртароқ ухлашингизга ёрдам беради. Бунда танадаги табиий ритм нормаллашиб, кун давомида инсон ўзини тетик ва яхши ҳис қилади.
Овқатланишингизга эътиборли бўлинг
Ўзингизни қандай ҳис қилишингизда фақатгина уйқу неча соат бўлгани эмас, нима тановул қилаётганингиз ҳам муҳим рол ўйнайди. Вақт йўқлигини баҳона қилиб, бир финжон қаҳва ва круассан билан чекланмасдан тўйимли ва фойдали маҳсулотлардан тайёрланган нонушта қилинг. Нонушта кунлик энергия манбаи ҳисобланади ва сиз куннинг биринчи ярмида истеъмол қилган таом кун давомида сизга куч ва энергия беради. Таомномангизда тухум, мева ва сабзавотлар албатта бўлсин, шунингдек, кўп суюқлик, лимонли сув, шарбат ичишни ҳам канда қилманг.
Мавзуга доир: Исталган парҳез самарадорлигини оширадиган 3 қоида
Вақтни тўғри тақсимланг
8 соат ухлашга вақтим йўқ дейишдан аввал кун тартибингизни кўздан кечиринг, муҳим бўлган ва бўлмаган ишларга кетадиган вақтингизни сарҳисоб қилинг. Ишончимиз комилки, 16 соат ичида 2 ё 3 соат ижтимоий тармоқ ёки телевизорга вақт сарфлайсиз. Шу вақтни соғлигингиз ва ишингиз самараси учун уйқу ҳисобига ўтказинг.
Кундузи ухламанг
Эсингиздами, боғчада тарбиячилар мажбурлаб ухлатишарди ? Чунки кундузги уйқу мактаб ёшигача бўлган болалар учун фойдали ва зарур, сиз-у биз учун эмас. Негаки бироз мизғиб олгач, қилиниши керак бўлган ишлар куннинг иккинчи ярмига қолади ва кечки ухлаш вақти чўзилиши мумкин.
Уйқуга алоҳида тайёрланинг
Ухлаш вақти бўлди деб, шартта бориб ётиб олманг. Ётишдан аввал душ қабул қилинг, сокин мусиқа тингланг, юмшоқ ва ётиш учун қулай пижамаларни кийинг, уйқудан аввал ўтли тинчлантирадиган чой ичинг. Ухлашдан аввал хона ҳавосини алмаштиришни ҳам унутманг. Ана шунда тинч ва хотиржам уйқуга кетиб, тонгда тетик ва яхши кайфиятда уйғонасиз.
Изоҳ (0)