Janubiy Koreya hukumati koronavirusdan davolanishga muvaffaq bo‘lgan 91 kishining testi ularning organizmida yana virus borligini ko‘rsatganini ma’lum qildi. Bu haqda mamlakat kasalliklar nazorati va profilaktikasi markazi direktori Chon In Kyonga tayanib, Reuters xabar berdi.
Ta’kidlanishicha, bu kabi holatlar ko‘payib bormoqda. Joriy haftaning boshida bunday bemorlar soni 50 kishini tashkil etgan edi. Chon In Kyonning so‘zlariga ko‘ra, ushbu insonlar qaytadan kasallikni yuqtirib olmagan, balki virus qayta faollashgan.
Ayni vaqtga kelib Janubiy Koreyada COVID-19 bilan kasallanganlar 10 450 tani tashkil etmoqda, 208 kishi vafot etgan.
Avvalroq Janubiy Koreyada kasallanish holatlari kamayayotgani haqida xabar berilgan edi. 10-aprel kuni mamlakatda 27 kishida koronavirus aniqlangan.
So‘nggi ma’lumotlarga ko‘ra, butun dunyo bo‘ylab yangi turdagi COVID-19 koronavirus infeksiyasi bilan kasallanganlar soni qariyb 1,7 million kishiga yaqinlashgan, virus oqibatida vafot etganlar soni 100 ming kishidan oshgan.
Izoh (0)