Тошкент шаҳар Юнусобод туманида электр энергияси истеъмоли бўйича тажриба тариқасида ўрнатилган базавий меъёрлар коронавирус сабабли бекор қилиниши ҳақида хабар берилган эди. «Kun.uz»нинг ёзишича, мазкур меъёрлар ҳали ҳам бекор қилинмаган.
Нашрнинг маълум қилишича, Юнусобод тумани аҳолиси фойдаланилган табиий газ ва электр энергиясининг лимитдан ошган қисми учун белгиланган тарифга нисбатан 1,2 баробар ҳақ тўлаш тартиби бекор қилинмаган.
Мавзуга доир: «Карантин пайтида коммунал хизматлар тўловида имтиёзлар бериладими?» Уй-жой ва коммунал хизмат кўрсатиш вазирлиги жавоб берди
Қайд этилишича, базавий меъёрлар бўйича тартиб ўз кучини йўқотмаганлиги ҳақида фуқаро Ж.Эшбоевнинг Президентга йўллаган мурожаатига МИБнинг Юнусобод туман бўлими томонидан берилган жавоб хатида баён этилган.
Фото: «Kun.uz»
Фуқаро Ж.Эшбоевнинг маълум қилишича, табиий газ ва электр энергияси учун лимит белгилаб қўйилиши кўп қаватли уйларда яшовчи хонадонларда билинмаслиги мумкин. Чунки аксарият ҳолларда кўп қаватли турар жойлар давлат томонидан иситилади. Лекин мазкур фуқаро каби ҳовлида яшовчи аҳолига бу тарзда лимит белгиланиши адолатсизлик ҳисобланади.
Унинг айтишича, ижтимоий тенглик бузилмоқда, қолаверса, бу каби чеклов фақат Юнусобод туманининг ўзи учун белгилангани икки ҳисса камситиш бўлмоқда. Фуқаронинг маълум қилишича, у уйини газ ва электр энергияси билан иситади, арзимаган лимит ойнинг ўнинчи кунига бормасдан тугаб бўлади, у ёғига 20 фоиз оширилган нархларда тўлайди. Бу, айниқса, карантин сабаб барча оила-аъзолари уйда бўлган вақтда жиддий сезилмоқда.
Туманнинг кўп қаватли уйларидан бирида яшовчи фуқаронинг сўзларига кўра, ҳамма ишда, ўқишда бўлган вақтда белгиланган лимитни амаллаб етказиш мумкин эди, лекин карантин сабаб ҳамма уйда ўтирганидан бери белгиланган лимитдан анчагина чиқиб кетилган.
