Ислом тараққиёт банки Ўзбекистонда коронавирусга қарши курашиш мақсадида яратилаётган янги шифохоналар учун тиббий ускуналар ва буюмларни тезкор харид қилишни молиялаштириш мақсадида жорий кредит портфелидан 17 миллион АҚШ доллари миқдорида маблағ йўналтирди. Бу ҳақда Инвестициялар ва ташқи савдо вазирлиги хабар берди.
8 апрель куни Ўзбекистон бош вазири ўринбосари — инвестициялар ва ташқи савдо вазири Сардор Умурзоқов Ислом тараққиёт банки (ИTБ) президенти Бандар Ҳажар билан видеоконференция форматида коронавирус тарқалиши шароитида аҳолини самарали ҳимоя қилишни таъминлаш, касалланганларга ўз вақтида ташхис қўйиш ва даволашда Ўзбекистон соғлиқни сақлаш тизими имкониятларини мустаҳкамлаш ҳамда глобал пандемияни ижтимоий-иқтисодий ривожланишга бўлган таъсирини юмшатиш мақсадидаги ҳамкорлик масалаларини муҳокама қилди.
ИTБ коронавирус билан касалланган беморлар учун қурилаётган янги шифохоналарни жиҳозлашга инфратузилма лойиҳалари доирасида иқтисод қилинган 46 миллион АҚШ долларини қайта йўналтириш орқали Ўзбекистонга қўшимча ёрдам кўрсатишга тайёрлигини билдирган.
ИTБ президенти мазкур йўналишда банк ўзининг шўъба институтлари бўлмиш Халқаро Ислом савдо-молия корпорацияси, Хусусий секторни ривожлантириш бўйича Ислом корпорацияси ва бошқаларнинг имкониятларидан фойдаланиб, кўмаклашишни кенгайтиришга тайёрлигини таъкидлади.
Мулоқот якунларига кўра, томонлар соғлиқни сақлаш тизими эҳтиёжлари ва Ўзбекистондаги кичик ва ўрта бизнес корхоналарини қўллаб-қувватлаш учун ИTБ томонидан умумий қиймати 140 миллион доллардан ортиқроқ бўлган қўшимча молиялаштиришни жалб этиш бўйича ишлашга келишиб олдилар.
Аввалроқ Европа тикланиш ва тараққиёт банки Ўзбекистон банкларига ёрдам тариқасида 220 миллион доллар кредит линиялари ажратиши ҳақида хабар берилганди.
Эслатиб ўтамиз, Ўзбекистонда коронавирус сабабли юзага келадиган иқтисодий муаммоларга қарши курашиш учун 10 триллион сўм ажратилган. Президент Шавкат Мирзиёев 9 апрель куни коронавирус пандемияси шароитида Ўзбекистон банк тизимининг барқарор ишлашини ҳамда иқтисодиётга молиявий кўмакчи бўлишини таъминлаш масалалари бўйича ўтказган йиғилишда иш ҳақини тўлаш учун корхоналарга кредитлар ажратиш зарурлигини таъкидлаганди.
Изоҳ (0)