Зоир Мирзаевдан ҳайфсан олган Ғузор ҳокими ўз хоҳишига кўра лавозимидан кетди

Ғузор тумани ҳокими Саъдулла Бобоқулов ўз аризасига кўра лавозимини тарк этди. Бу ҳақда вилоят ҳокимлиги ахборот хизмати хабар бермоқда.

«Фидойи хизматлари учун вилоят ҳокими Саъдулла Бобоқуловга раҳмат айтиб, саломатлигини тиклаб, тез орада сафимизга қайтишига тилак билдирди» — дейилади вилоят ҳокимлиги хабарида.

Эслатиб ўтамиз, Ғузор тумани ҳокими вилоят ҳокими Зоир Мирзаевдан биринчи ҳайфсан олган ҳоким ҳисобланади. Зоир Мирзаев Саъдулла Бобоқуловни сайловга тайёргарлик кўришда йўл қўйган хатоси учун ҳайфсан берганди. Вилоят ҳокими, шунингдек, Саъдулла Бобоқуловни одамлар билан мулоқот қилолмасликда айблаганди.

Саъдулла Бобоқуловнинг Жиноят ишлари бўйича Ғузор тумани суди раиси Саттор Ақанов билан суҳбати интернетда тарқалгач, ҳоким «Дарё» мухбирига «Ҳокимлар қарғага ўхшаб қолдик» деганди.

Вилоят ҳокимлигининг қўшимча қилишича, туман прокурори лавозимида фаолият юритган Бекзод Суюнов туман ҳоким вазифасини бажарувчи этиб тайинланган.