Yunusobodda elektr energiyasi va gaz iste’moli bo‘yicha o‘rnatilgan bazaviy me’yorlar hali ham bekor qilinmagani ma’lum bo‘ldi

Toshkent shahar Yunusobod tumanida elektr energiyasi iste’moli bo‘yicha tajriba tariqasida o‘rnatilgan bazaviy me’yorlar koronavirus sababli bekor qilinishi haqida xabar berilgan edi. “Kun.uz”ning yozishicha, mazkur me’yorlar hali ham bekor qilinmagan.

Nashrning ma’lum qilishicha, Yunusobod tumani aholisi foydalanilgan tabiiy gaz va elektr energiyasining limitdan oshgan qismi uchun belgilangan tarifga nisbatan 1,2 barobar haq to‘lash tartibi bekor qilinmagan.

Qayd etilishicha, bazaviy me’yorlar bo‘yicha tartib o‘z kuchini yo‘qotmaganligi haqida fuqaro J.Eshboyevning Prezidentga yo‘llagan murojaatiga MIBning Yunusobod tuman bo‘limi tomonidan berilgan javob xatida bayon etilgan.

Fuqaro J.Eshboyevning ma’lum qilishicha, tabiiy gaz va elektr energiyasi uchun limit belgilab qo‘yilishi ko‘p qavatli uylarda yashovchi xonadonlarda bilinmasligi mumkin. Chunki aksariyat hollarda ko‘p qavatli turar joylar davlat tomonidan isitiladi. Lekin mazkur fuqaro kabi hovlida yashovchi aholiga bu tarzda limit belgilanishi adolatsizlik hisoblanadi.

Uning aytishicha, ijtimoiy tenglik buzilmoqda, qolaversa, bu kabi cheklov faqat Yunusobod tumanining o‘zi uchun belgilangani ikki hissa kamsitish bo‘lmoqda. Fuqaroning ma’lum qilishicha, u uyini gaz va elektr energiyasi bilan isitadi, arzimagan limit oyning o‘ninchi kuniga bormasdan tugab bo‘ladi, u yog‘iga 20 foiz oshirilgan narxlarda to‘laydi. Bu, ayniqsa, karantin sabab barcha oila-a’zolari uyda bo‘lgan vaqtda jiddiy sezilmoqda.

Tumanning ko‘p qavatli uylaridan birida yashovchi fuqaroning so‘zlariga ko‘ra, hamma ishda, o‘qishda bo‘lgan vaqtda belgilangan limitni amallab yetkazish mumkin edi, lekin karantin sabab hamma uyda o‘tirganidan beri belgilangan limitdan anchagina chiqib ketilgan.