Tesla компанияси ўзининг Хитойдаги замонавий заводи қандай ишлаши тасвирланган ажойиб видео билан бўлишди. Дронлар ёрдамида олинган видеодан кўриш мумкинки, заводда кам одам ишласа-да, роботлар жуда кўп, деб хабар беради Motor.
Илон Маск яқин келажакда Tesla заводлари тўлиқ автономга айланишига ишонади, шу сабабли цехнинг ичида биринчи навбатда ишлаб чиқаришнинг барча жараёнларида иштирок этаётган жуда кўп миқдордаги роботлар кўзга ташланади. Америка корпорацияси раҳбарининг фикрича, ишлаб чиқаришнинг роботлаштирилиши автоматизация жараёнларини оширади, бу эса якуний маҳсулот тайёр бўлишини тезлаштиради. Бироқ инсон кучидан тўлиқ воз кечишга ҳали анча вақт бор ва кўплаб технологик жараёнларни ҳамон корхона ходимлари бажариб келмоқда.
Tesla ўзининг Шанхайдаги заводини бир йил ичида қуриб, фойдаланишга топширган. Корхона аввал бошдан фақат Model 3 седанлари учун кузов ишлаб чиқариш ва якуний йиғиш ишлари билан шуғулланади. Муҳим компонентлар, хусусан, электродвигатель импорт қилинмоқда. Model 3 седанларининг илк харидорлари ўз электрокарларини ўтган йилнинг декабрида қабул қилиб олган.
Хитой коронавирус пандемиясидан халос бўлгани сабаб Шанхайдаги автозавод ўз фаолиятини қайта йўлга қўйган ва бир ҳафта ичида Model 3 седанини ишлаб чиқариш уч минг нусхага етган, йиллик ишлаб чиқаришни эса 150 минг электромобилга етказиш режалаштирилган.
Изоҳ (0)