2020 йил 24 октябрь куни Американинг VanDerBrink кимошди уйи 129 нодир автомобиль ва мотоцикллардан иборат коллекцияни сотувга қўяди. Улар шиширма батутлар ишлаб чиқарувчи компания эгаси Боб Регерга тегишли бўлган, деб хабар қилди Motor.
Бизнесменнинг коллекциясидан асосан 1928—1987 йиллар оралиғида Америкада ишлаб чиқарилган автомобиллар ўрин олган. Бундан ташқари, Боб Регер умри давомида ўз гаражига 1973 йилда ишлаб чиқарилган Jaguar XJ6 ва 1979 йилга тегишли Ferrari 308 GTS’ни, шунингдек, Suzuki ва Honda CJ360 япон мотоциклларини қўшиб қўйишга муваффақ бўлган. Унинг ўлимидан сўнг, бизнесменнинг қариндошлари барча машиналарни сотиб юборишга қарор қилди.
Боб Регер ўнлаб ноёб автомобилларни йиғган. Масалан, Ford’нинг 1932 йили ишлаб чиқарилган 17 модели, Chevrolet Corvette’нинг 8 та турли авлодлари, иккита Ford Thunderbird, 1968 йилги Chevrolet Camaro RS ва 1970 йилги Plymouth Cuda, шунингдек, 1972 йили ишлаб чиқарилган Pontiac GTO моделлари ўрин олган.
Марҳумнинг ноёб коллекцияси қанчага баҳолангани ҳозирча номаълум. Таъкидланишича, барча автомобиллар улкан омборда сақланмоқда ва уларнинг аксарияти жуда яхши аҳволда.
Изоҳ (0)