Тошкентда «Яндекс.Такси» сервиси «Етказиб бериш» («Доставка») хизматини ишга туширди.
Фойдаланувчилар хизмат орқали ўз яқинларига кийим-кечак, озиқ-овқат ёки дориларни бериб юбориши мумкин, кичикроқ компаниялар эса буюртмаларни мижозларига юбора олади. Бу ҳайдовчилар учун буюртма олиш имконияти бўлиб хизмат қилади.
Етказиб бериш хизматини одатда буюртмалар амалга ошириладиган мобил дастурдан топиш мумкин.
Хизматдан фойдаланиш учун буюртмани қабул қилиб оладиган инсоннинг телефон рақами ва яшаш манзили кўрсатилади. Унинг телефонига келган SMS ҳавола орқали сайтга кириб, машина ҳаракатини кузатиш мумкин. Жўнатмаларни юбориш учун уни автомобиль ҳайдовчиси қўлига топшириш керак, қабул қилиб олувчи эса белгиланган манзилга чиқиб, пулини тўлаб, жўнатмани олиб кетади.
Масалан, «Ракат» маҳалласидан 16-сонли шаҳар касалхонасига қадар буюртмани жўнатиш тахминан 10 минг сўмга тушади. Ҳозирча хизмат ҳаққи фақат нақд пул кўринишида қабул қилинади.
Тошкент шаҳри аҳолиси қўшимча ҳақ эвазига «Эшикдан эшиккача» функциясидан ҳам фойдалана олади. Бунда ҳайдовчи жўнатмани квартира ёки офис эшигидан олиб кетиб, белгиланган манзилга топширади.
Бундан ташқари, изоҳларда контактсиз етказиб бериш усулидан ҳам фойдаланса бўлади. Бу ҳолда ҳайдовчи жўнатмани белгиланган манзилга олиб бориб, қабул қилиб олувчи пулни тўлаши ва жўнатмани қабул қилиб олишини кутиб туради.
«Хизмат кўрсатишда синалган, махсус ўқиган, шунингдек, инфекция тарқалишининг олдини олишга қарши профилактика чораларидан бохабар ҳайдовчилар ишлайди», — дейилади компания хабарида.
Буюмларни юборишдан олдин уни конверт, қути ёки пакетга жойлаштириш лозим. Шунингдек, у машинага сиғишини ва 20 килограммдан оғир бўлмаслигини ҳисобга олиш керак. Масалан, ҳайдовчи орқали жамадон, ҳужжатлар ёки буюмлар солинган пакетни бериб юборса бўлади. Велосипед, кир ювиш машинаси, қандил каби нарсалар мумкин эмас.
Изоҳ (0)