Нидерландияда яшовчи кекса аёл коронавирусдан тузалган дунёдаги энг кекса бемор бўлди, деб хабар берди «НLTimes.nl».

Фото: Reuters

Гуре-Оверфлакке оролида яшовчи Корнелия Рас 17 март куни 107 ёшга тўлган. Туғилган кунидан бир кун ўтиб аёлнинг аҳволи ёмонлашган. Унинг тана ҳарорати кўтарилиб, йўтала бошлаган.

У яшайдиган қариялар уйида 41 кишида коронавирус аниқланган.

Корнелия коронавирусни юқтиргани ҳақидаги хабарни босиқлик билан қабул қилган. Аёл икки ҳафта даволанганидан сўнг бутунлай соғайган. У билан бирга коронавирус аниқланган кексаларда касаллик оғир кечган. Корнелия яшайдиган қариялар уйида ҳозирга қадар коронавирусдан 12 киши вафот этган.

Жаҳон соғлиқни сақлаш ташкилотининг маълумотига кўра, Корнелия коронавирусдан соғайган энг кекса инсон ҳам бўлиши мумкин.

Ташкилотнинг ҳисоб-китобига кўра, коронавирусга чалинган 80 ёшдан ошган беморларнинг 21,9 фоизи вафот этади.