Тошкент вилоятининг Чирчиқ шаҳридаги тўйхона тиббий ниқоблар ишлаб чиқарадиган яширин цехга айлантирилгани ҳақида хабар берилган эди. Ҳуқуқшунос ва блогер Хушнудбек Худойбердиев Ўзбекистонда тиббий ниқоб етишмовчилиги юқори бўлиб турган бир пайда Солиқ қўмитасининг бу каби ҳаракатини қоралаб чиқди. Давлат солиқ қўмитаси ушбу материал юзасидан расмий баёнот берди.
Чирчиқ шаҳар давлат солиқ инспекцияси томонидан «Азия» тўйхонасида инсонларнинг ноқонуний йиғилиши бўйича аҳолидан «Ишонч телефони»га тушган эътирозлар асосида, бевосита жойига чиқиб ўрганган.
Таъкидланишича, тўйхонадаги тиббий ниқоб ишлаб чиқариш «цехи» фаолиятида Республика комиссияси томонидан чиқарилган карантин қоидалари ва санитария талаблари қўпол равишда бузилгани аниқланган.
Чирчиқ шаҳар Санитария-эпидемиология назорати давлат инспекциясининг 2020 йил 4 апрелдаги далолатномасида, «Азия» тўйхонасида ташкил этилган тиббий ниқоб ишлаб чиқариш цехи мутлақо санитария нормаларига тўғри келмаслиги, жумладан, ходимларнинг температурасини ўлчаш йўлга қўйилмаганлиги, махсус кийим бош йўқлиги, кийимларни алмаштириш хонаси мавжуд эмаслиги, ишлаб чиқариш цехида ҳаво алмаштириш тизими йўқлиги, хонани тозалаш ва вируслардан зарарсизлантириш ишларини ташкил этиш учун зарур анжомлари ва дизенфексия воситалари билан таъминланмаганлиги қайд этилган.
«Ишлаб чиқариш жараёнида, тасдиқланган минимал ижтимоий масофа (1,5 метр) сақланмаган ҳолда ташкил этилган иш шароити, карантин тартибларининг қўпол ҳолда бузилиши ҳисобланади ва коронавирус инфекцияси тарқалишига омил бўлади. Бу эса ўша тўйхона биносида яширин ишлаётган 260 нафар (аниқлаштирилган маълумот) фуқаронинг авваламбор ўзлари, қолаверса, улар билан алоқада бўладиган оила аъзолари ҳамда қанчадан қанча инсонлар соғлиғига жуда катта хавф солишини тасаввур қилишнинг ўзи қўрқинчли.
Фақатгина тирикчилик мақсадида тайёрланаётган тиббиёт ниқоблари, ҳар куни юзлаб одамлар босиб ўтадиган бинонинг пол қисмидаги гилам устида тўпланиб, оддий полиэтилен пакетларига ўралган эди.
Тиббиёт мутахассисларининг фикрига кўра, ушбу тиббиёт ниқобларини харид қилиб, уларни ишониб таққан ҳар бир инсонга вирус юқмаслигига ҳеч ким кафолат бермайди», — дейилади хабарда.
Мазкур ҳолат юзасидан, Чирчиқ шаҳар прокуратураси ҳузуридаги Иқтисодий жиноятчиликка қарши курашиш департаменти томонидан санитарияга оид қонун ҳужжатлари ва эпидемияга қарши курашиш қоидалари бузилганлиги бўйича 6 апрель куни жиноят иши қўзғатилган.
Изоҳ (0)