Тошкентда 5 апрель кунидан эътиборан 6-сонли туғруқхона карантинга ёпилган. Бу ҳақида бош санитария инспектори Нурмат Отабеков 9 апрель куни АOKА ҳузурида ташкил этилган штабдаги брифингда маълум қилди.
«Бемор билан мулоқотда бўлган бир кишида коронавирус аниқланди. Шунинг учун туғруқхона мажмуаси 14 кунга карантинга бутунлай ёпилди. Барча беморлар, туққан аёллар, болалар ва персонал тиббий кузатувга олинади. 14 кунлик карантиндан кейин туғруқхона персонали, мижозлари, болалар орасида коронавирус инфекцияси йўқлиги аниқланса, карантин бекор қилинади», — дейди Нурмат Отабеков.
Қайд этилишича, ҳозирда коронавирус билан зарарланиш кўп ҳолатларда биринчи беморлар билан мулоқотда бўлган шахсларда ёки хориждан қайтганидан кейин карантинга жойлаштирилган фуқаролар орасида аниқланмоқда.
«123 та ҳолатда хориж давлатларидан кириб келди. Вирус Ўзбекистонга дунёнинг 7 та мамлакати орқали кириб келди. Беморларнинг қолган қисми ана шу шахслар билан мулоқотда бўлишган. Шунинг учун биз беморлар билан мулоқотда бўлган шахслар орасида беморларни қидирамиз. Мақсад – уларни изоляция қилиш. Кейинги ҳаракатлар ана шу ўчоқни ликвидация қилишга йўналтирилади», — дейди Нурмат Отабеков.
Айни пайтда Ўзбекистонда коронавирусга чалинганлар сони 555 нафарни ташкил қилмоқда. Ўзбекистондан ташқари Австрия, Арманистон, АҚШ, БАА, Жанубий Корея, Покистон, Россия, Таиланд ва Қозоғистонда ҳам жами 23 нафар ватандошда коронавирус аниқланган, улардан уч нафари (барчаси АҚШда) вафот этган. Вафот этганлардан бири Ўзбекистонда хизмат кўрсатган артист, таниқли шашмоқам ижрочиси Рустам Самарқандий эди.
Изоҳ (0)