Toshkent viloyatining Chirchiq shahridagi to‘yxona tibbiy niqoblar ishlab chiqaradigan yashirin sexga aylantirilgani haqida xabar berilgan edi. Huquqshunos va bloger Xushnudbek Xudoyberdiyev O‘zbekistonda tibbiy niqob yetishmovchiligi yuqori bo‘lib turgan bir payda Soliq qo‘mitasining bu kabi harakatini qoralab chiqdi. Davlat soliq qo‘mitasi ushbu material yuzasidan rasmiy bayonot berdi.
Chirchiq shahar davlat soliq inspeksiyasi tomonidan “Aziya” to‘yxonasida insonlarning noqonuniy yig‘ilishi bo‘yicha aholidan “Ishonch telefoni”ga tushgan e’tirozlar asosida, bevosita joyiga chiqib o‘rgangan.
Ta’kidlanishicha, to‘yxonadagi tibbiy niqob ishlab chiqarish “sexi” faoliyatida Respublika komissiyasi tomonidan chiqarilgan karantin qoidalari va sanitariya talablari qo‘pol ravishda buzilgani aniqlangan.
Chirchiq shahar Sanitariya-epidemiologiya nazorati davlat inspeksiyasining 2020-yil 4-apreldagi dalolatnomasida, “Aziya” to‘yxonasida tashkil etilgan tibbiy niqob ishlab chiqarish sexi mutlaqo sanitariya normalariga to‘g‘ri kelmasligi, jumladan, xodimlarning temperaturasini o‘lchash yo‘lga qo‘yilmaganligi, maxsus kiyim bosh yo‘qligi, kiyimlarni almashtirish xonasi mavjud emasligi, ishlab chiqarish sexida havo almashtirish tizimi yo‘qligi, xonani tozalash va viruslardan zararsizlantirish ishlarini tashkil etish uchun zarur anjomlari va dizenfeksiya vositalari bilan ta’minlanmaganligi qayd etilgan.
“Ishlab chiqarish jarayonida, tasdiqlangan minimal ijtimoiy masofa (1,5 metr) saqlanmagan holda tashkil etilgan ish sharoiti, karantin tartiblarining qo‘pol holda buzilishi hisoblanadi va koronavirus infeksiyasi tarqalishiga omil bo‘ladi. Bu esa o‘sha to‘yxona binosida yashirin ishlayotgan 260 nafar (aniqlashtirilgan ma’lumot) fuqaroning avvalambor o‘zlari, qolaversa, ular bilan aloqada bo‘ladigan oila a’zolari hamda qanchadan qancha insonlar sog‘lig‘iga juda katta xavf solishini tasavvur qilishning o‘zi qo‘rqinchli.
Faqatgina tirikchilik maqsadida tayyorlanayotgan tibbiyot niqoblari, har kuni yuzlab odamlar bosib o‘tadigan binoning pol qismidagi gilam ustida to‘planib, oddiy polietilen paketlariga o‘ralgan edi.
Tibbiyot mutaxassislarining fikriga ko‘ra, ushbu tibbiyot niqoblarini xarid qilib, ularni ishonib taqqan har bir insonga virus yuqmasligiga hech kim kafolat bermaydi”, — deyiladi xabarda.
Mazkur holat yuzasidan, Chirchiq shahar prokuraturasi huzuridagi Iqtisodiy jinoyatchilikka qarshi kurashish departamenti tomonidan sanitariyaga oid qonun hujjatlari va epidemiyaga qarshi kurashish qoidalari buzilganligi bo‘yicha 6-aprel kuni jinoyat ishi qo‘zg‘atilgan.
Izoh (0)