Хитойда ўтган бир сутка ичида коронавирусга чалиниш бўйича 62 та янги ҳолат аниқланди, 2 киши вафот этди. 112 киши тузалди, деб хабар бермоқда «РИА Новости» мамлакат Соғлиқни сақлаш миллий комиссияси маълумотларига таяниб.
Қайд этилишича, касалланганларнинг 25 нафари вирусни четдан, қолган 3 нафари эса мамлакатнинг ўзида юқтирган.
Умумий ҳисобда, Хитойда коронавирусни четдан юқтириш билан боғлиқ 1 042 та ҳолат қайд этилган. Улардан 714 нафари касалланганлигича қолмоқда (шундан 23 нафарининг аҳволи оғир), 328 киши тузалган.
Жонс Ҳопкинс маълумотларига кўра, Хитойда коронавирус аниқланганидан буён 82 758 киши касаллангани тасдиқланган, 3337 киши вафот этган.
Эслатиб ўтамиз, Хитой ҳукумати 1 апрелдан бошлаб коронавирус ҳеч қандай белгиларсиз тарқалаётгани ҳақида маълум қилганди. Сўнгги суткада 137 та шундай ҳолат аниқланган. Уларнинг 102 таси четдан юқтирилган.
Шунингдек, ўтган бир сутка ичида 64 кишига карантиндан жавоб берилган. Тест уларда вирус борлигини кўрсатган бўлса-да, бироқ касалликнинг ҳеч қандай аломатлари аниқланмаган. Айни пайтда касаллик аломатлари кузатилмаётган яна 1 095 киши шифокорлар назоратида бўлиб турибди.
Изоҳ (0)