Трампнинг капитали коронавирус пандемияси сабаб 1 млрд доллар йўқотган

АҚШ президенти Дональд Трампнинг активларининг умумий қиймати охирги ойларда коронавирус пандемияси сабаб 1 миллиард долларга пастлаган ва бу собиқ бизнесменнинг аввал фаол бўлган иқтисодий соҳаларида кузатилган, деб ёзмоқда Forbes.

«Бир ой аввал АҚШ президентининг бойлиги 3,1 миллиард доллар деб ҳисобланганди. Энди ушбу рақам — 2,1 миллиард долларни ташкил қилмоқда», — дейилади Forbes хабарида.

АҚШ президентининг активлари капитализацияси унинг компаниялари фаолият олиб борадиган йўналишлардаги нархлар ўзгаришига қараб баҳоланган. Журнал экспертлари тижорий кўчмас мулк коронавирус пандемияси сабаб инқирозни бошдан кечирмоқда. 1–18 март кунлари бир нечта девелоперлик компаниялари хусусан, Boston Properties ҳамда Vornado Realty Trust акциялари 37 фоизга арзонлашди, Трамп компаниясининг асосий улуши айнан шу соҳага тўғри келади.

Энг катта зарар Нью-Йорк ва Сан-Францискодаги савдо ҳамда офис кўчмас мулк соҳаларида кузатилган. Бир ой ичида 700 миллион доллар йўқотилди, нархлар эса 1,9 миллиарддан 1,2 миллиард долларга тушиб қолди. Трамп эгалик қиладиган бешта штатдаги турар жой нархлари 235 миллиондан 148 миллионгача пастлаган. Меҳмонхоналар бизнеси ҳам жиддий зарба қабул қилиб олди. Вашингтондаги меҳмонхона ва Майамидаги курортнинг умумий қиймати 107 миллиондан 38 миллион долларга тушиб қолди. Гавайи, Уругвай, Ҳиндистон ва бошқа давлатлардаги брендинг ва меҳмонхоналар бошқаруви 80 миллион долларлик нархдан 42 миллион долларгача пастлаган. АҚШдаги ўнлаб голф-клубларнинг ва Европадаги учта объектнинг умумий қиймати ҳам 271 миллион эди ва энди 217 миллион долларни ташкил қилмоқда. Ҳашамдор уйлар ва бошқа мулклар нархи ҳам 348 миллионлик қийматдан энди 295 миллион долларга тушган.

Трампнинг фақат «пул ёстиқчаси»гина барқарор ҳолатда қолди — инқирозгача 160 миллион доллар нақд пули бўлган президент ўша пулларни ўзгармас қийматда ушлаб турибди.

6 апрелда Оқ уйдан туриб қилган видеобаёноти давомида Дональд Трамп қоронғи туннел охирида нур кўринаётганини қайд этиб, яқин келажакда Америка халқи коронавирус устидан қозонилган ғалабадан фахрланиши мумкинлигини таъкидлаганди.

АҚШ президентининг фикрича COVID-19 юқтириб олиш ҳолатлари энг кўп учраётган Нью-Йорк штатида коронавирусдан вафот этганлар сонининг камайиши ҳукуматнинг мамлакатдаги вазиятни ўз бошқарувига олганидан дарак беради.