Қозоғистонда коронавирус билан касалланганлар сони 700 кишидан ошиб кетди. Бу ҳақда мамлакат Соғлиқни сақлаш вазирлигига таяниб, «РИА Новости» хабар берди.
Ҳозирга қадар Қозоғистонда коронавирус оқибатида олти киши вафот этди, 51 киши даволанишга муваффақ бўлди.
«Бугунги кунга келиб мамлакатда коронавирус билан касалланиш бўйича 704 та ҳолат қайд этилган», — дейилади хабарда.
Қозоғистон Соғлиқни сақлаш вазирлигининг маълумотларига кўра, 8 апрель тонгида инфекция билан касалланиш бўйича яна еттита ҳолат қайд этилган: Қизилўрда вилоятида — учта ва Атирау вилоятида эса тўртта ҳолат.
Аввалроқ Қозоғистонда тиббиёт ходимларининг 120 нафари коронавирус юқтириб олгани ҳақида хабар берилганди.
Эслатиб ўтамиз, 8 апрель соат 10:00 ҳолатига кўра, Ўзбекистонда коронавирусга чалинганлар сони 534 нафарга етди. Мамлакатда 15 мартдан бери 30 киши касалликдан соғайди, икки киши касаллик қурбони бўлди.
Изоҳ (0)