Ўзбекистондаги диний конфессиялар раҳбарлари мамлакат аҳолисини карантин қоидаларига амал қилишга ва карантин даврида уйда қолишга чақирди. Бу ҳақда «Дарё»га Дин ишлари қўмитаси хабар берди.
Тошкент ва Ўзбекистон Епархияси раҳбари Митрополит Викентий проваслав динига эътиқод қилувчиларни Патриарх Кириллнинг уйда қолиш ҳақидаги чақириғига қулоқ тутишга ҳамда черковга боришдан тийилишга чақирган. Унинг маълум қилишича, яқинлашиб келаётган пасха байрамини ҳамма ўз уйида нишонлайди. Черков жараёни онлайн тарзда намойиш этилади.
Рим-католик черкови раҳбари Ежи Маъсулевич бугунги кунда ҳукумат комиссияси томонидан берилаётган топшириқларга тўла амал қилган ҳолда ниқобларни тақиб юришни сўраган. У барчани уйда қолиб, ибодат қилишга чақирган. Черков раҳбарининг маълум қилишича, 2020 йилнинг 12 апрель куни бўлиб ўтиши режалаштирилган пасха байрами ибодати черковда одамларсиз бажарилади. Бу жараён онлайн тарзда уйда қолган ҳолда амалга оширилиши таъминланади. Байрам куни интернет орқали мулоқот амалга оширилади.
Арман апостол черкови раҳбари Арамаис Григорян мазкур дин вакилларини уйда қолишга чақириб, 12 апрель куни пасха байрами ёпиқ эшиклар ортида ўтказилишини маълум қилган. Жараённи эса уйда ўтирган ҳолда онлайн тарзда кузатиш мумкин бўлади.
Тошкент Яҳудийлар диний жамоаси раҳбари Аркадий Исахаров жорий қилинган карантин сабабли синагогда барча байрам тадбирлари вақтинчалик тўхтатилганини билдирган. У карантин қоидаларига барча тушунган ҳолда амал қилишига умид билдирган. Диний жамоа раҳбари ҳар бир оилани байрамларни ўз уйида нишонлашга чақирган.
Эслатиб ўтамиз, Ўзбекистонда коронавирус билан боғлиқ дастлабки ҳолат қайд этилгач, ҳукумат мамлакатдаги диний идораларга диний маросимлар ўтказишни вақтинча чеклаш бўйича илтимос билан мурожаат қилган эди. Шундан сўнг, Ўзбекистон Мусулмонлари идораси раиси, муфтий Усмонхон Алимов мусулмонларга мурожаат қилиб, мамлакатда эпидемиологик вазият барқарорлашгунга қадар жума намозлари ўрнига уйда пешин намози ўқилишини билдирган эди.
Изоҳ (0)