AOKA qoshidagi maxsus shtabda 7-aprel, seshanba kuni, bo‘lib o‘tgan onlayn brifingda Tashqi ishlar vazirligi axborot xizmati rahbari Avazbek Hojimatov chet elda tahsil olayotgan o‘zbekistonlik talabalarning O‘zbekistonga qaytarilishi haqidagi savolga javob qaytardi.
Vazirlik vakilining aytishicha, O‘zbekistonga qaytish istagini bildirgan xorijdagi talabalar ro‘yxatlari shakllantirilib, ma’lumotlar charter reyslarni tashkillashtirish bilan bog‘liq masalalarni ko‘rib chiqish uchun Respublika maxsus komissiyasi, mas’ul vazirlik va idoralarga kiritilgan.
“Qat’iy karantin choralari joriy qilingan, vaqtincha mamlakatga kirish-chiqish to‘xtatilgan bir sharoitda chet eldagi talabalardan shaxsiy gigiyena qoidalariga amal qilishlarini, yashab turgan joylarini tark etmasliklarini, o‘zlari joylashgan davlatlarining rasmiy idoralari tomonidan joriy qilingan tartiblarga rioya qilishlarini so‘raymiz”, — deya talabalarga murojaat qilgan Avazbek Hojimatov.
TIV axborot xizmati rahbarining qo‘shimcha qilishicha, hozir xorijda bo‘lib turgan fuqarolar, jumladan, talaba yoshlarning murojaatlariga o‘z vaqtida javob qaytarish, ularning huquq va manfaatlarini himoya qilish uchun chet eldagi barcha elchixonalar va konsullik muassasalari huzurida tezkor shtablar ham ishlab turibdi.
Tashqi ishlar vazirligi vakili brifingda xorijdagi fuqarolar haqidagi xabarlarni tekshirmasdan tarqatmaslikni so‘radi.
“Feyk xabarlar ko‘p, shuning uchun turli saytlar va internet nashrlarida biror ma’lumotni tarqatishdan oldin uni rasmiy resurslardagi axborotlar orqali tekshirib ko‘rish muhim”, — dedi Avazbek Hojimatov.
Hojimatov ayrim shaxslar tomonidan xorijdagi fuqarolar orasida qiyin ahvolga tushib qolganligi uchun diplomatik vakolatxonalardan yordam so‘ralgan turli murojaatlarni tarqatish hollari ko‘payib borayotganini qayd etgan va bu kabi ma’lumotlarni tarqatayotgan shaxslar bilan bog‘lanish, voqea joyiga borib muammoni aniqlash va chet el vakolatli idoralari bilan aloqa o‘rnatish uchun elchixona hamda konsulxonalar xodimlari katta resurs va ko‘p vaqt sarflayotganini ta’kidlagan.
“Shuncha vaqt sarflab o‘rganilganda esa xabar yolg‘on bo‘lib chiqyapti. Murojaat tarqatgan fuqaro bilan uchrashuv chog‘ida u asossiz axborot tarqatganligi uchun uzr so‘rayapti, xolos”, — degan TIV vakili.
Izoh (0)