Ўзбекистона тиббиёт олий таълим муассасаларида мутахассисликка оид бўлмаган фанлар 2 баравар қисқартирилади ва ўрнига замонавий диагностика ва даволаш усулларини ўрганиш фанлари киритилади.
Бу ҳақда Президент томонидан имзоланган «Тиббий-санитария соҳасида кадрларни тайёрлаш ва узлуксиз касбий ривожлантиришнинг мутлақо янги тизимини жорий этиш чора-тадбирлари тўғрисида»ги қарорида белгиланди.
Шунингдек, республикада врачларга эҳтиёж юқори бўлган ҳудудлар учун 2020/2021-ўқув йилида бакалавриат ва магистратурага давлат гранти асосида ўқишга қабул параметрлари 50 фоизгача оширилади.
Ҳудудларнинг шифокорларга бўлган эҳтиёжидан келиб чиққан ҳолда тиббиёт олий таълим муассасалари бакалавриатнинг «Даволаш иши», «Педиатрия иши» ва «Касбий таълим (даволаш иши)» таълим йўналишлари бўйича давлат гранти асосида ўқишга қабул кўрсаткичлари доирасидаги мақсадли қабул параметрлари туман (шаҳар)лар кесимида шакллантирилади.
Юқоридаги йўналишлар битирувчилари яшаш бўйича рўйхатга олинган жойидан қатъи назар давлат гранти асосида мақсадли қабул параметрларида кўрсатилган туман (шаҳар)да камида 5 йил ишлаб бериши лозим бўлади.
Аввалроқ Ўзбекистонда тиббиёт коллежлари Ибн Сино номидаги саломатлик техникумларига айлантирилиши хабар берилган эди.
Изоҳ (0)