Qashqadaryo viloyatining Yakkabog‘ tumanida haydovchiga qo‘pol munosabatda bo‘lgan YPX inspektorlari vazifasidan bo‘shatildi. Bu haqda viloyat IIB axborot xizmati xabar bermoqda.
https://www.youtube.com/watch?v=i6-pfvAj1nY&t=282s
Ma’lum bo‘lishicha, 2020-yilning 26-fevral kuni Yakkabog‘ tumanining Jiyda qishlog‘ida xizmat vazifasini bajarayotgan 4 nafar YPX inspektorlari Lacetti haydovchisini to‘xtatib, spirtli ichimlik iste’mol qilmaganiga ishonch hosil qilmoqchi bo‘ladi. Haydovchi esa YPX xodimlarida buni tekshiruvchi alkotestr yo‘qligini aytib, kunning qorong‘i paytida jiletsiz faoliyat yuritayotganidan norozi bo‘ladi.
Haydovchini to‘xtatgan YPX inspektori esa “Mendan jilet so‘rash sizgamas, boshlig‘im bor, so‘raydigan. Qolaversa, jilet mening xavfsizligim uchun, siz uchunmas” deya haydovchiga qo‘pol munosabatda bo‘ladi. Ikkinchi xodim esa haydovchining bu e’tiroziga qo‘pol javob qaytarish barobarida haydovchini “aql” o‘rgatmaslikka chaqiradi. Suhbat davomida YPX inspektorlari haydovchining avtomobili kalitini olib qo‘yib, ketishga chog‘lanadi. Biroq, mashinada biroz yurgach, ortga qaytadi va mashina kaltini haydovchiga qaytaradi.
Viloyat IIB axborot xizmatining ma’lumot berishicha, IIB YHXB YPXB 2-YPX otryadi 3-safarbarlik guruhi katta inspektorlari — katta serjant G‘olib Egamnazarov, O‘ktam Eshonqulov, YPX inspektorlari safdor Mahmud Jonuzoqov, Elyor Bo‘ritoshevning ushbu xatti-harakati o‘rganib chiqilgan.
Haydovchi bilan qo‘pol munosabatda bo‘lgan katta inspektor G‘olib Egamnazarov xizmat faoliyati davomida shu kabi ko‘plab salbiy holatlarga yo‘l qo‘yganligi uchun ichki ishlar safidan bo‘shatilgan. O‘ktam Eshonqulov hamda safdor Mahmud Jonuzoqovlar esa viloyat IIB boshlig‘i huzurida o‘tkazilgan navbatdan tashqari attestatsiya xulosasiga ko‘ra, YHXB bilan bog‘liq bo‘lmagan boshqa xizmatga o‘tkazilgan.
Izoh (0)