АҚШда ўтган бир сутка ичида коронавирусдан 1736 киши вафот этди. Бу мамлакатда вирус тарқалганидан буён бир сутка ичида ўлим ҳолатлари бўйича энг юқори кўрсаткич ҳисобланади. Бу ҳақда Жонс Ҳопкинс университети маълумотларида келтирилган.
АҚШдаги бундан олдинги рекорд 4 апрель куни ўрнатилган эди — бир сутка ичида 1344 киши вафот этган.
Шу вақтга қадар АҚШда коронавирус сабаб вафот этганлар сони 12,7 минг кишидан ошди. Энг кўп ўлим ҳолатлари Нью-Йоркда қайд этилган (4009) бўлиб, ушбу шаҳар АҚШда коронавирус пандемиясининг эпимарказига айланган. Шунингдек, Нассо (500) ва Уэйн (402) округлари ҳам қурбонлар сони бўйича юқори поғоналардан ўрин олган.
Маълумотларига кўра, АҚШ ҳудудида коронавирус билан касалланганлар сони 398 минг кишига етган, 22 мингга яқин бемор даволанишга муваффақ бўлган.
АҚШ қурбонлар сони бўйича дунёда Италия (17 минг) ва Испаниядан (14 минг) кейин учинчи ўринда кетмоқда.
Аввалроқ АҚШ президенти Дональд Трамп мамлакатда коронавирус оқибатида вафот этадиганлар сони 100 минг кишига етиши тўғрисидаги тахминлар амалга ошмаслигига умид қилишини билдирганди.
Мавзуга доир:
Изоҳ (0)