АҚШ президенти Дональд Трамп агар Ҳиндистон коронавирусни даволашда қўлланиладиган безгакка қарши дори воситасини етказиб беришдан бош тортса, унга қарши чоралар кўришини билдирди, деб хабар бермоқда Bloomberg. Бу ҳақда у Оқ уйда ўтказилган брифингда маълум қилган.
Трамп Ҳиндистон бош вазири Нарендра Модининг ушбу препаратнинг бошқа давлатларга экспорт қилишни тўхтатиш ҳақидаги қарорига изоҳ берар экан, бундай қарор унга ёқмаётганини ва у ҳақиқатан ҳам, унинг қарори бўлиб чиқса, ҳайрон қолишини билдирган. Унинг айтишича, яқинда Моди билан телефонда гаплашган ва у бу ҳақда ҳеч нарса демаган.
«Менга бу қарор ёқмаяпти, бу айнан унинг қарори эканлигини эшитмадим. У препаратларни бошқа давлатларга етказиб беришни тўхтатганидан хабарим бор. Агар АҚШга нисбатан ҳам шундай йўл тутса, ҳайрон қолган бўлардим, чунки Ҳиндистоннинг АҚШ билан муносабатлари жуда яхши», — деган у. Агар шундай қилса ҳам, бу нормал ҳолат эканлиги, лекин унга жавобан, албатта, чоралар кўришини таъкидлаган.
Аввалроқ Трамп коронавирусни даволашда безгакда қўлланадиган дориларни тавсия қилиб, шифокорларга босим ўтказгани хабар берилган эди.
Эслатиб ўтамиз, АҚШнинг Озиқ-овқат маҳсулотлари ва дори воситалари сифати бўйича санитария назорати бошқармаси (Food and Drug Administration — FDA) безгакка қарши гидроксихлорохин ва хлорохин препаратларидан коронавирусга чалинган беморларни даволашда фойдаланишга фавқулодда рухсат берганди. Россия Федерал тиббий-биологик агентлиги (ФТБА) ҳам безгакни даволашда фойдаланиладиган мефлохин дори воситасини коронавирусни даволашда фойдаланиш мумкинлигини маълум қилган.
The Washington Post эса ушбу препаратлар етарли равишда синовдан ўтказилмаганини, мутахассислар унинг кўплаб салбий таъсирларидан огоҳлантираётганини айтиб ўтган.
Изоҳ (0)