Жаҳон ҳамжамияти коронавирус пандемияси сабаб тиббиёт персонали, жумладан, ҳаширалар етишмаслиги муаммосига дуч келди. ЖССТнинг «Ҳамширалик иши ҳолати, 2020 йил» номли ҳисоботига кўра, дунёга 5,9 миллион нафар ҳашира етишмайди. Бу ҳақда «РИА Новости» хабар берди.
«Ҳисоб-китобларга кўра, дунёда ҳамширалик хизматларида 28 миллион нафар тиббиёт ходими меҳнат қилади. 2013–2018 йиллар давомида уларнинг сони 4,7 миллионга ўсган. Бироқ ҳамширалар персоналининг етишмаслик ҳолати барибир сақланиб турибди ва тахминан 5,9 миллион нафар ходим етишмайди. Ушбу муаммо айниқса Африка, Жануби-шарқий Осиё ва Ўртаер денгизининг шарқий соҳилларидаги ЖССТ ҳудудларида, шунингдек, Лотин Америкасининг бир қатор давлатларида анча жиддий», – дейилади ЖССТ, Халқаро ҳамширалар кенгаши ва «Ҳамширалик иши бугунги кунда» глобал компанияси биргаликда тайёрлаган ҳисоботда.
Кадрлар етишмаётган мамлакатлар муаммони ҳал этиш учун йиллик битирувчилар кўрсаткичини ўртача 8 фоизгача кўтариши лозим. Ушбу натижага эришишга тахминан жонбошига 10 доллар маблағ сарф этилади.
«Сиёсатчилар профессионал ҳамшираларни етиштириш ва мамлакатда сақлаб қолишга қанча пул кетишини яхши билади, бироқ энди ҳозирги шароитда тиббиёт ходимларининг ўрни қай даражада экани барчага маълум бўлди. Ҳамширалик ишини ривожлантиришга сарф этилган ҳар бир доллар жамиятга, одамларнинг, оилаларнинг саломатлигига хизмат қилади», – дейди Халқаро ҳамширалар кенгаши раиси Аннет Кеннеди.
Ҳисоботда давлатларнинг ҳамширалар тайёрлаш жараёнини тезлаштириши ва уларни иш билан таъминлаш масалаларига эътибор қаратиши зарурлиги қайд этилган.
Изоҳ (0)