Amerika hukumati o‘zining sa’y-harakati bilan COVID-19 koronavirus infeksiyasi oqibatida qurbonlar sonining yanada ortib ketishi oldini oldi. Bu haqda AQSh prezidenti Donald Tramp matbuot anjumani vaqtida ma’lum qildi.

Foto: Reuters

Trampning so‘zlariga ko‘ra, Oq uy hech nima qilmaganida COVID-19 virusidan 2 milliondan ortiq amerikalik o‘lib ketgan bo‘lardi.

“Agarda o‘lim sonini 100-200 mingga qadar qisqartira olsak, yaxshi ishlagan bo‘lamiz”, — deydi Tramp.

Shuningdek, u koronavirus tarqalishiga qarshi choralarni 30-aprelga qadar uzaytirish bo‘yicha topshiriq bergan. Amerika yetakchisining ta’kidlashicha, AQShda koronavirus oqibatida vafot etish holatlarining eng yuqori nuqtasi keyingi ikki hafta davomida kuzatilishi mumkin. Mamlakatning pandemiyadan qayta oyoqqa turishi esa 1-iyundan boshlanadi.

Avvalroq AQShda koronavirus sabab fuqarolarning harakat marshrutini ularning smartfonlari orqali kuzatish boshlangani haqida xabar berilgandi. So‘nggi ma’lumotlarga ko‘ra, AQShda koronavirus bilan kasallanganlar soni 142,5 mingdan oshgan.