Хитойда январь ойидан буён биринчи марта ўтган бир сутка ичида ҳеч ким COVID-19 коронавирус инфекцияси оқибатида вафот этмади. Бу ҳақда Хитой Соғлиқни сақлаш миллий комиссияси маълумотларида келтирилган.
Ўтган бир сутка ичида мамлакатда коронавирус билан касалланганлар сони 32 кишига ошган бўлиб, уларнинг барчаси четдан юқтирилган.
Пандемия бошланганидан буён Хитойда 81,7 мингдан ортиқ одам коронавирус билан касалланган, 3,3 мингдан ортиқ одам вафот этган. Касалларнинг аксарияти — 77 мингдан ортиғи соғайган. Комиссия ҳисоботларига кўра, Хитой ҳукумати 22 январдан бошлаб коронавирус оқибатида вафот этганлар ҳақида маълумот бериб келган. Мамлакатда коронавирус оқибатида вафот этиш бўйича биринчи ҳолат 11 январда қайд этилган.
Ҳозирда мамлакатда 1242 нафар касал қолган. Таққослаш учун, Италияда ўтган бир сутка ичида 3599 кишида коронавирус аниқланган.
Эслатиб ўтамиз, Хитой Ташқи ишлар вазирлиги 28 мартдан бошлаб дунё бўйлаб коронавирус пандемияси тарқалиши сабаб визаси бор ёки яшаш ҳуқуқига эга бўлган чет элликларнинг мамлакатга киришини вақтинча чеклади. 1 апрелдан бошлаб эса коронавирус ҳеч қандай белгиларсиз тарқалаётгани ҳақида маълумот берганди.
Изоҳ (0)