Оксана Чусовитина Тошкентдаги жамоавий карантин ва Токио Олимпиадасининг қолдирилгани ҳақида

Спорт гимнастикаси бўйича етти карра Олимпиада ўйинлари иштирокчиси Оксана Чусовитина Тошкентдаги карантин, Токио Олимпиадасининг қолдирилгани ва бошқа бир қатор саволларга жавоб қайтарди, деб ёзади «РИА Новости».

— Ўзбекистонда карантин режими қандай?

— Тошкентга кириш ва шаҳардан чиқиш чекланган, бизнинг федерация барчани бир жойга тўплашга қарор қилди. Омадимиз бор экан, зал ва меҳмонхона бир жойда. Барча терма жамоалар — спорт ва бадиий гимнастикачилар ҳеч қаерга чиқмаган ҳолда яшаяпти ва шуғулланмоқда. Бу ерга ҳеч ким киритилмаяпти ва ҳеч ким чиқарилмаяпти.

— Мулоқотсиз қийин эмасми? Айниқса севимли Тошкентда?

— Қийин, бироқ вазият шунақа. Бунга риоя қилиш керакми, демак риоя қиламиз. Биз икки ярим ҳафтадан буён шундай яшаяпмиз. Мен телефон ва Skype орқали боғланиб турибман. Онам, синглим ва турмуш ўртоғим билан кўришиб турибмиз. Фақат телефон орқали (кулади). Апрель ойи охиригача шу ерда бўлишимизни айтишди.

— Бир тарафдан Олимпиада қолдирилгани маълум қилинди. Яна бир йил кутиш учун сизда кайфият ва сабр етарлими?

— Мендаги сабр икки йилга ҳам етади. Агар икки йил кейинга сурилса ҳам машғулотларда давом этаман, нима қилиб бўлмасин саккизинчи Олимпиадамда қатнашаман! Келажакка назар солар экансан, икки йилдан кейин Осиё ўйинлари, яна икки йил ўтиб Париж Олимпиадаси (кулади).

— Олимпиаданинг сурилгани сизга плюсми ёки минус?

— Бу мен учун яхши бўлди, чунки қийин сакраш элементини тайёрлаш учун кўпроқ вақт бўлади. Ҳар доим плюс томонини ўйлайман, минусни эмас.

— Бироқ рақибларингизда ҳам қийин элементларни тайёрлаш учун вақт бўлади шундай эмасми?

— Билишимча, рақибларимнинг барчаси машғулот заллари ёпиқлиги сабаб бекорчи бўлиб қолган. Бизнинг федерация эса шуғулланишимиз учун шундай шароит яратиб берди (кулади).

— Ундайлар бор, тўғриси, Симона Байлснинг уйи орқасида зал мавжуд.

— Симона ҳақида гапирмаса ҳам бўлади! У, менимча, машғулотларсиз ҳам исталган вазифани уддалайди. Бу танаффус унга аниқ фойда келтиради. Баҳонада озгина дам олади!

— Ростини айтганда, ҳозирда кутиш кимларга босим ўтказмоқда?

— Демак, бундай. Масалан, Жаҳон кубоги орқали Олимпиада йўлланмаси учун курашиши керак бўлган қизларга нисбатан, менга ҳозир анча осон. Улар ҳозир саралаш баҳслари бўлиш ёки бўлмаслигини билмайди. Бу улар учун руҳан ва жисмонан жуда оғир. Кутиш жуда қийин. Олимпиада йўлланмасига эга чиққанларга анча осон. Ҳозир карантин, бироқ менга бир ярим ойлик машғулотлар етарли. Янада осон бўлгани, мен кўпкурашда иштирок этмайман ва фақат битта йўналишда тайёргарлик кўряпман. Жамоавий баҳсларда иштирок этадиганларга эса жуда қийин бўлади.

— Халқаро гимнастика федерацияси атлетлар комиссияси раҳбари сифатида юқоридагилар билан бу мавзуда суҳбатлашиб турибсизми?

— Йўқ, биз билан ҳеч нарсани муҳокама қилишмайди. Кимлар биландир муҳокама қилиш керак бўлса, у ҳолда улар — Халқаро Олимпия қўмитаси вакиллари. Бироқ ўйлашимча, улар билан ҳам кўп ҳам маслаҳат қилинмайди. Бу глобал муаммо ва у бошқача усулда ечилади. Албатта, исталган спортчи Олимпиада ўз вақтида бўлишини истайди. Барча шунга тайёргарлик кўрганди. Бироқ вазият шундай бўлдики ва барчамиз бир хил ҳолатда қолдик. Сабр қиламиз, кутамиз. Бу бизни ўлдирмайди, кучли қилади!

— Одатда Олимпиадага қадар бир қатор халқаро мусобақалар бўлиб ўтади ва унда амалиёт етарлича тўпланади. Бироқ шундай вазият бўлиши мумкинки, ҳеч қандай мусобақасиз Олимпиадага боришга тўғри келиши мумкин. Бу Олимпия ўйинларини янада қизиқарли қиладими?

— Менимча, ҳа. Олимпиада олдидан ҳеч қандай мусобақа бўлмаса, ким нимага қодирлигини кўриш жуда қизиқ бўлади деб ўйлайман.

— 1992 йилги Олимпиада олдидан сизларда кўплаб мусобақалар бўлганми?

— Мусобақалар деярли бўлмаган. Фақат Иттифоқ чемпионати ўтказилганди.

— Демак бу вазият сиз учун янгилик эмас, шундайми?

— Ҳа, бунақаси бир неча бор содир бўлган. 2005 йилда тиззамдан операция бўлганимдан сўнг етти ой шуғулланмадим ва Австралиядаги Жаҳон чемпионатига йўл олдим. У ерда иккинчи ўринни олдим!

— Сизнинг оптимистик кайфиятингиз барчага аён. Сиз билан ҳозирда карантинда бўлиб турганлар қандай аҳволда?

— Барчамизда кайфият аъло даражада. Бу ерда караоке бор, куйлаяпмиз, кабоб тайёрлаяпмиз. Бизда ҳаммаси яхши. Меҳмонга келинглар!