Oksana Chusovitina Toshkentdagi jamoaviy karantin va Tokio Olimpiadasining qoldirilgani haqida

Sport gimnastikasi bo‘yicha yetti karra Olimpiada o‘yinlari ishtirokchisi Oksana Chusovitina Toshkentdagi karantin, Tokio Olimpiadasining qoldirilgani va boshqa bir qator savollarga javob qaytardi, deb yozadi “RIA Novosti”.

— O‘zbekistonda karantin rejimi qanday?

— Toshkentga kirish va shahardan chiqish cheklangan, bizning federatsiya barchani bir joyga to‘plashga qaror qildi. Omadimiz bor ekan, zal va mehmonxona bir joyda. Barcha terma jamoalar — sport va badiiy gimnastikachilar hech qayerga chiqmagan holda yashayapti va shug‘ullanmoqda. Bu yerga hech kim kiritilmayapti va hech kim chiqarilmayapti.

— Muloqotsiz qiyin emasmi? Ayniqsa sevimli Toshkentda?

— Qiyin, biroq vaziyat shunaqa. Bunga rioya qilish kerakmi, demak rioya qilamiz. Biz ikki yarim haftadan buyon shunday yashayapmiz. Men telefon va Skype orqali bog‘lanib turibman. Onam, singlim va turmush o‘rtog‘im bilan ko‘rishib turibmiz. Faqat telefon orqali (kuladi). Aprel oyi oxirigacha shu yerda bo‘lishimizni aytishdi.

— Bir tarafdan Olimpiada qoldirilgani ma’lum qilindi. Yana bir yil kutish uchun sizda kayfiyat va sabr yetarlimi?

— Mendagi sabr ikki yilga ham yetadi. Agar ikki yil keyinga surilsa ham mashg‘ulotlarda davom etaman, nima qilib bo‘lmasin sakkizinchi Olimpiadamda qatnashaman! Kelajakka nazar solar ekansan, ikki yildan keyin Osiyo o‘yinlari, yana ikki yil o‘tib Parij Olimpiadasi (kuladi).

— Olimpiadaning surilgani sizga plyusmi yoki minus?

— Bu men uchun yaxshi bo‘ldi, chunki qiyin sakrash elementini tayyorlash uchun ko‘proq vaqt bo‘ladi. Har doim plyus tomonini o‘ylayman, minusni emas.

— Biroq raqiblaringizda ham qiyin elementlarni tayyorlash uchun vaqt bo‘ladi shunday emasmi?

— Bilishimcha, raqiblarimning barchasi mashg‘ulot zallari yopiqligi sabab bekorchi bo‘lib qolgan. Bizning federatsiya esa shug‘ullanishimiz uchun shunday sharoit yaratib berdi (kuladi).

— Undaylar bor, to‘g‘risi, Simona Baylsning uyi orqasida zal mavjud.

— Simona haqida gapirmasa ham bo‘ladi! U, menimcha, mashg‘ulotlarsiz ham istalgan vazifani uddalaydi. Bu tanaffus unga aniq foyda keltiradi. Bahonada ozgina dam oladi!

— Rostini aytganda, hozirda kutish kimlarga bosim o‘tkazmoqda?

— Demak, bunday. Masalan, Jahon kubogi orqali Olimpiada yo‘llanmasi uchun kurashishi kerak bo‘lgan qizlarga nisbatan, menga hozir ancha oson. Ular hozir saralash bahslari bo‘lish yoki bo‘lmasligini bilmaydi. Bu ular uchun ruhan va jismonan juda og‘ir. Kutish juda qiyin. Olimpiada yo‘llanmasiga ega chiqqanlarga ancha oson. Hozir karantin, biroq menga bir yarim oylik mashg‘ulotlar yetarli. Yanada oson bo‘lgani, men ko‘pkurashda ishtirok etmayman va faqat bitta yo‘nalishda tayyorgarlik ko‘ryapman. Jamoaviy bahslarda ishtirok etadiganlarga esa juda qiyin bo‘ladi.

— Xalqaro gimnastika federatsiyasi atletlar komissiyasi rahbari sifatida yuqoridagilar bilan bu mavzuda suhbatlashib turibsizmi?

— Yo‘q, biz bilan hech narsani muhokama qilishmaydi. Kimlar bilandir muhokama qilish kerak bo‘lsa, u holda ular — Xalqaro Olimpiya qo‘mitasi vakillari. Biroq o‘ylashimcha, ular bilan ham ko‘p ham maslahat qilinmaydi. Bu global muammo va u boshqacha usulda yechiladi. Albatta, istalgan sportchi Olimpiada o‘z vaqtida bo‘lishini istaydi. Barcha shunga tayyorgarlik ko‘rgandi. Biroq vaziyat shunday bo‘ldiki va barchamiz bir xil holatda qoldik. Sabr qilamiz, kutamiz. Bu bizni o‘ldirmaydi, kuchli qiladi!

— Odatda Olimpiadaga qadar bir qator xalqaro musobaqalar bo‘lib o‘tadi va unda amaliyot yetarlicha to‘planadi. Biroq shunday vaziyat bo‘lishi mumkinki, hech qanday musobaqasiz Olimpiadaga borishga to‘g‘ri kelishi mumkin. Bu Olimpiya o‘yinlarini yanada qiziqarli qiladimi?

— Menimcha, ha. Olimpiada oldidan hech qanday musobaqa bo‘lmasa, kim nimaga qodirligini ko‘rish juda qiziq bo‘ladi deb o‘ylayman.

— 1992-yilgi Olimpiada oldidan sizlarda ko‘plab musobaqalar bo‘lganmi?

— Musobaqalar deyarli bo‘lmagan. Faqat Ittifoq chempionati o‘tkazilgandi.

— Demak bu vaziyat siz uchun yangilik emas, shundaymi?

— Ha, bunaqasi bir necha bor sodir bo‘lgan. 2005-yilda tizzamdan operatsiya bo‘lganimdan so‘ng yetti oy shug‘ullanmadim va Avstraliyadagi Jahon chempionatiga yo‘l oldim. U yerda ikkinchi o‘rinni oldim!

— Sizning optimistik kayfiyatingiz barchaga ayon. Siz bilan hozirda karantinda bo‘lib turganlar qanday ahvolda?

— Barchamizda kayfiyat a’lo darajada. Bu yerda karaoke bor, kuylayapmiz, kabob tayyorlayapmiz. Bizda hammasi yaxshi. Mehmonga kelinglar!