4 апрель куни Москва вилоятининг Орехово-Зуево шаҳрида жойилашган беш қаватли уйда газ портлади. Портлаш Гагарин кўчасидаги 31-уйда содир бўлган, деб хабар қилади Meduza.
Россия Фавқулодда вазиятлар вазирлигининг маълум қилишича, учинчи қаватдаги квартиралардан бирининг газ колонкаси портлаб кетган. Портлаш оқибатида подъезднинг учинчи қаватдан бешинчи қаватгача бўлган қисми қулаб тушган. Иккинчи подъезддаги бешта квартира буткул вайрон бўлган, биринчи подъезддаги яна тўртта квартирага шикаст етган.
«Три верхних этажа разрушены полностью»: Взрыв газа в пятиэтажном доме в Орехово-Зуево pic.twitter.com/LWobCNg0Zz
— Сергей Ильин🇷🇺 (@sergey270178) April 4, 2020
Таъкидланишича, газ портлаши оқибатида уч киши ҳалок бўлган, яна олти киши жароҳат олган. Ҳалок бўлганларнинг биринчиси дарҳол топилган, қолган икки нафари вайроналар остидан бир неча соат ўтгач чиқариб олинган. Жароҳат олганларнинг уч нафари жонлантириш бўлимида, қолганларига тиббий ёрдам кўрсатилган. «Интерфакс»нинг ёзишича, жабрланганлар орасида 15 ёшли қиз ҳамда 47 ва 57 ёшли икки аёл бор.
Шаҳар маъмуриятининг маълум қилишича, кўп қаватли уйдан 200 киши эвакуация қилинган бўлиб, улар яқин атрофдаги мактабга жойлаштирилган. 150 киши мустақил равишда уйларини тарк этган бўлса, яна 50 кишига қутқарувчилар ёрдам кўрсатган.
Тергов қўмитаси портлаш нима сабабдан юзага келганини аниқлаш борасида суриштирув ишларини бошлаб юборган. Тахминлардан бирига кўра, газ қурилмалари билан эҳтиётсиз муносабатда бўлганлик оқибатида табиий газ сизиб чиққан бўлиши мумкин.
Изоҳ (0)