Хитойда ўтган бир сутка ичида коронавирусдан 3 киши вафот этди, касалликка чалиниш бўйича 30 та янги ҳолат аниқланди, уларнинг 25 таси четдан юқтирилган, деб хабар бермоқда «РИА Новости» мамлакат Соғлиқни сақлаш миллий комиссияси маълумотларига таяниб.
Сўнгги ҳафталарда Хитойда деярли барча касалланиш ҳолатлари четдан юқтириб келинган эди, аммо охирги кун ичида Гуандун провинциясида касалланишнинг 5 та ҳолати чет элга чиқмаган фуқароларда қайд этилган.
Умумий ҳисобда Хитойда коронавирусни четдан юқтириш билан боғлиқ 913 та ҳолат қайд этилган. Улардан 697 киши касалланганлигича қолмоқда (шундан 18 нафарининг аҳволи оғир), 216 киши тузалган.
Жонс Ҳопкинс университети маълумотига кўра, айни пайтда Хитойда коронавирусга чалинганлар сони 82 558 тага етган, 76 946 киши касалхонадан чиқарилган, 3 333 киши вафот этган.
Эслатиб ўтамиз, Хитой ҳукумати 1 апрелдан бошлаб коронавирус ҳеч қандай белгиларсиз тарқалаётгани ҳақида маълумот берганди. Сўнгги суткада 47 та шундай ҳолат аниқланган. Уларнинг 16 таси четдан келган фуқаролардан юққан.
Шунингдек, қайд этилишича, ўтган бир сутка ичида 50 кишига карантиндан жавоб берилган. Тест уларда вирус борлигини кўрсатган бўлса-да, бироқ касалликнинг ҳеч қандай аломатлари аниқланмаган. Айни пайтда касаллик аломатлати кузатилмаётган яна 1 024 киши шифокорлар назоратида бўлиб турибди.
Изоҳ (0)