АҚШнинг Нью-Йорк штатида яшовчи фотограф коронавирус туфайли эълон қилинган карантин пайтида қўшни қиз билан танишишнинг ноодатий усулини ўйлаб топди, деб ёзади Метро.
28 ёшли Жереми Коэн ўз уйи деразасидан бўшаб қолган Нью-Йорк кўчаларини суратга олаётганида томда рақсга тушаётган қизга кўзи тушди.
Йигит қоғоз олиб унга телефон рақамини ва танишиш таклифини ёзиб, дрон орқали қизга етказди. Шундан сўнг 24 ёшли Тори исмли қиз унга «Салом, бу томдаги қиз!» деб SMS ёзди.
Фотограф Торининг хонадошидан масофавий учрашув ташкиллаштиришда ёрдам сўради. У ўз балконида кичик стол безатиб, Торининг томига ҳам худди шундай стол қўйиб беришни сўради. Йигит ва қиз видеоалоқа орқали боғланиб, тез тил топишиб кетди.
Шундан сўнг Коэн қизни ҳақиқий учрашувга таклиф қилди. Хавфсизлик қоидаларига риоя қилган ҳолда йигит катта шиширилган шаффоф пуфак ичида учрашувга келди.
«Пуфак бизнинг иккинчи учрашувимиз учун айни муддао эканлигини билгандим. Қиз ростдан ҳам ҳайратда қолди», — дейди Коэн ҳазил аралаш.
Ҳақиқий жентелменлардек Коэн Тори учун гулдаста сотиб олди, ёнига антисептик ҳам қўшди. Бироқ пуфак туфайли у қизга олинган совғаларни бера олмади.
«Биз сайр вақтида гаплашишга қийналдик, лекин роса кулдик», — дейди фотограф.
Коэн қиз билан танишиш тарихи ва учрашувларини видеога олиб, ижтимоий тармоқларга жойлаштириб борди. Роликлар ижтимоий тармоқ фойдаланувчиларига манзур бўлди.
«Умид қиламанки, биз у билан тез орада яна кўришамиз», — деб ёзади Коэн.
Изоҳ (0)