Россия 4 апрелдан бошлаб ўз фуқароларини ватанга қайтариш бўйича барча халқаро парвозларни тўхтатади, деб хабар бермоқда «Интерфакс» ўз манбаларига таяниб. Шунингдек, чет эл фуқароларини Россиядан олиб чиқиб кетувчи рейслар ҳам бекор қилинади.
Қайд этилишича, Росавиация коронавирус туфайли тақиқлар сабаб хорижий давлатларда қолиб кетган россияликларни олиб келиш учун ўтган ҳафтада чеклов қўйган бўлиб, 500 нафаргача фуқаро олиб келиниши мумкин бўлган.
Мамлакат ТИВ ҳисоб-китобларига кўра, чет элдан ватанга қайтиб келиш истагида бўлган Россия фуқаролари сони, тахминан, 25 минг кишини ташкил этмоқда.
«Коммерсантъ»нинг ёзишича, Росавиация 5 апрелга қадар Перу, Германия, Таиланд, Япония, АҚШ ва бошқа давлатлардан россияликларни қайтариш учун ташкиллаштириладиган чартер рейсларнинг келиш вақтлари графигини тузаётган бўлган. Уларнинг ҳаммаси бекор қилинган.
Ҳатто «Аэрофлот»нинг 3 апрель куни Нью-Йоркдан Москвага келиши лозим бўлган рейси ҳам самолёт парвозга кўтарилишининг сўнгги дақиқаларида бекор қилинган.
Парвозлар қанча муддатга тўхтатилгани ҳозирча номаълум.
Эслатиб ўтамиз, Ўзбекистонда коронавирус сабаб халқаро йўналишларда йўловчи ташиш 20 мартдан бошлаб 40 кун муддатга тўхтатилганди.
Изоҳ (0)