Москва аэропортларида ўзбекистонликлар йўқлиги маълум қилинди

Ўзбекистоннинг Москвадаги элчихонаси Россия матбуотида 31 март куни «Домодедово» халқаро аэропортидан чартер рейслар билан уйларига қайтиш истагидаги 300 нафарга яқин Марказий Осиёдан бўлган меҳнат мигрантлари чиқариб юборилгани ҳақидаги хабарлар юзасидан изоҳ берди.

«Ўзбекистоннинг Москвадаги элчихонаси ‘Домодедово’ ва ‘Жуковский’ аэропортларида Ўзбекистон фуқароларининг тўпланиши ҳолатларини рад этди», — дейилади «Дунё» ахборот агентлиги тарқатган баёнотда.

Дипломатик ваколатхонага кўра, «Внуково» ва «Шереметево» аэропортларида бўлган ватандошларнинг аксарияти чартер рейсларида Ўзбекистонга олиб кетилган. Айни пайтда эса икки давлат ўртасидаги чартер рейслар тўхтатилган.

Москвада яшашга имкони бўлмаган 160 га яқин ўзбекистонлик навбатдаги чартер рейслар ташкил этилгунга қадар яшаш учун барча шароит яратилган хостел (ётоқхона)га жойлаштирилган. Хусусан, кунига уч маҳал иссиқ овқат ташкил этилган, улар билан доимий алоқа ўрнатилган.

Москвадаги Ўзбекистон элчихонасининг «Gazeta.uz»га хабар қилишича, ҳозирда Россия пойтахти аэропортларида Ўзбекистон фуқаролари йўқ. Фуқароларни хостелларга жойлаштириш билан боғлиқ барча масалалар ҳал қилинган.

Чартер рейсларини кутаётган фуқароларни Бандлик ва меҳнат муносабатлари вазирлиги ҳузуридаги Ташқи меҳнат миграцияси агентлиги ҳамда Uzbekistan Airways авиакомпанияси ҳам қўллаб-қувватлаган.

«Домодедово»дан мигрантлар чиқариб юборилгани ҳақида 31 март куни тунда журналист Галия Ибрагимова Facebook саҳифасида маълум қилган эди. Кейинроқ «РИА Новости» агентлиги вазият ҳақида репортаж тайёрлади.

Унда таъкидланишича, «Домодедово»дан чиқариб юборилган мигрантлар аниқлаштирилган маълумотларга кўра, Тожикистон фуқароларидир. Аэропорт ходимининг қайд этишича, эрталаб уларни маҳаллий тожик диаспораси автобусда олиб кетган.