«Ўзтўқимачиликсаноат» уюшмаси раиси Илҳом Ҳайдаров республика бўйича тиббий ниқоб ишлаб чиқариш ҳажми кейинги ҳафта 5 миллон донага етказилишини маълум қилди. Бу ҳақда у АОКА ҳузуридаги штабда 2 апрель, пайшанба куни, ўтказилган брифингда айтиб ўтган.
«Жуда қисқа муддатда ‘ҳимоя воситалари’ ишлаб чиқарилиши бир неча баробар ошди: февраль ойида бор-йўғи 20 га яқин корхона ушбу йўналишда фаолият юритган бўлса, ҳозирда ишлаб чиқариш қувватлари 10 баробарга оширилди.
Ҳимоя ниқобларини ишлаб чиқариш қувватлари республика бўйича 200 мингдан 2,5 миллион тага етказилди ва кейинги ҳафта ичида улар 5 миллион донага етказилади. Шунингдек, 12 мингдан ортиқ ҳимоя халатлари (комбинезон) ишлаб чиқарилмоқда», — деган у.
Шу куни ўтказилган брифингда иштрок этган Фармацевтика тармоғини ривожлантириш агентлиги директори Сардор Кариев 2020 йилнинг 1 март ҳолатига кўра, жами 15 та тиббий ниқоб ишлаб чиқарувчи корхона бўлгани, уларнинг кунлик ишлаб чиқариш қуввати 450-500 минг донани ташкил этганини маълум қилган.
1 апрелга келиб эса тиббий ниқоб ишлаб чиқарувчи корхоналарнинг сони 190 тага етгани ва уларнинг умумий ишлаб чиқариш қувватлари 4,3 миллион донага кўтарилганини айтган.
Эслатиб ўтамиз, Ўзбекистонда 25 мартдан бошлаб жамоат жойларида ниқобсиз юриш тақиқланган. Ниқобсиз юрган шахслар жаримага тортилади.
Изоҳ (0)