Xorij mamlakatlaridagi va og‘ir ahvolda qolgan O‘zbekiston fuqarolarining manfaatlarini himoya qilish maqsadida, prezident Shavkat Mirziyoyev Respublika maxsus komissiyasiga fuqarolarni mamlakatga qaytarish bo‘yicha aviareyslarni tashkillashtirishga ko‘rsatma berdi. Bu haqda Tashqi ishlar vazirligi axborot xizmati xabar bergan.
Foto: Prezident matbuot xizmati
Komissiya O‘zbekistonga parvoz qiladigan quyidagi charter reyslar jadvalini tuzib chiqdi:
21-mart kuni Moskva shahridan (Rossiya) soat 03:30da (Toshkentga yetib kelgan); Dehli shahridan (Hindiston) soat 17:30da;
22- mart kuni Kuala-Lumpur shahridan (Malayziya) soat 04.30da; Moskva shahridan (Rossiya) soat 05:00da; Istanbul shahridan (Turkiya) soat 06:00da va Novosibirsk shahridan (vaqti aniqlashtirilmoqda);
23-mart kuni Seul shahridan (Koreya Respublikasi) soat 02:00da;
24-mart kuni Jakarta shahridan (Indoneziya) soat 07:00da;
26-mart kuni Bangkok shahridan (Tailand) soat 01:00da.
Boshqa mamlakatlardan fuqarolarni qaytarish ishlari ham davom ettiriladi, deyiladi TIV xabarida.
O‘zbekistonga qaytgan fuqarolar Jahon sog‘liqni saqlash tashkiloti talablariga ko‘ra 14 kunlik karantinga joylashtiriladi.
Mavzuga doir:
2020-yil 20-mart holatiga ko‘ra O‘zbekistonda koronavirusga chalinganlar soni 33 nafarga yetgan. O‘zbekistonda 21-martdan choyxona va oshxonalar yopildi va 23-martdan to‘ylarning o‘tkazilishi bekor qilinadi. Koronavirus sabab xalqaro yo‘nalishlarda yo‘lovchi tashish 40 kunga to‘xtatilgan.
Koronavirus pandemiyasi sabab yuzaga kelgan inqirozga qarshi choralar dasturi ishlab chiqilgan va davlat budjeti hisobidan iqtisodiy muammolarga qarshi kurashish uchun 10 trillion so‘m mablag‘ ajratiladi.
