Тони Фергюсонга қарши бекор бўлган жангдан сўнг Ҳабиб Нурмагомедовни Владимир Путиндан шахсий самолёт сўраб турмаганликда айблашмоқда. Спортчи эса бу айбловларга жавоб қайтарди.
«Хусусий самолёт? Унда айтинг-чи, Албукерке полицияси нима учун Жон Жонс билан боғлиқ вазиятда унга бошқача муносабатда бўлмади? Нима учун?
У барча даврларнинг энг яхши жангчиларидан бири. Улар эса нима қилди (Жонс рухсатномасиз қурол сақлагани ва маст ҳолатда машина бошқаргани учун ҳибсга олинди — таҳририят)?
Сиз эса мен чемпион бўлганим учун, шахсий самолёт беришади деб ўйлайсизми? Путин ёки Трампга қўнғироқ қиламанми? Одам шунчалик ҳам аҳмоқ бўладими? Минглаб одамлар вафот этмоқда.
Кимгадир қўнғироқ қилишга мажбурманми? Дэйна Уайт Трампга қўнғироқ қилади, мен эса Путинга: ‘Илтимос, менга самолёт беринг’, кейин яна Трампга қиламан: ‘Илтимос, менга АҚШ ҳудудига кириш учун рухсат беринг’. Ақл бовар қилмас ҳаракатлар-а!», — дейди Нурмагомедов.
Эслатиб ўтамиз, Ҳабиб Нурмагомедов Конор Макгрегор устидан қозонган ғалабасидан сўнг Россия Федерацияси президенти Владимир Путин билан учрашганди. Ўшанда Путин Ҳабибга ҳар қандай вазиятда қўнғироқ қилиши мумкинлигини айтиб телефон рақами берганди.
Изоҳ (0)