Адлия вазири Русланбек Давлетов «Ўзбекистон 24» телеканалига берган интервьюсида махсус рухсатномаларсиз ҳаракатланаётган ҳайдовчиларга қандай чора кўрилиши ҳақидаги саволга жавоб берди.
«Жавобгарлик масаласи бўйича бир нарсани тушунтиришимиз керак. Бугунги кунда бу ҳайдовчилар кўчага чиққани учун йўл ҳаракати қоидаларини бузганлик тўғрисида жавобгарликка тортилмайди. Чунки улар йўл ҳаракати қоидасини бузмаяпти. Бу ерда карантин, эпидемиологияга қарши курашиш қонунлари билан боғлиқ жавобгарлик бор», — деди Давлетов.
«Маъмурий жавобгарлик тўғрисидаги кодекснинг 54-моддаси бўйича карантин қоидаларини бузиш деган модда билан жавобгарликка тортилади. Унда белгиланган жарималар жуда юқори, 4 миллион сўмдан бошланади. Шунинг учун ҳаммага тавсия ва талаб ҳам шундан иборатки, бунга йўл қўймаслик керак», – деди Давлетов ва стикерсиз ҳаракатланаётган таксида «иккита пицца»ни ўриндиққа қўйиб, ўз ишлари билан шуғулланиб юрганлар ҳам борлигини афсус билан айтиб ўтди.Адлия вазири, рухсатнома бериладиган алоҳида ҳолатларга ҳам тўхталиб ўтди. Унинг айтишича, Махсус комиссиянинг баёнида аниқ ёзилган. У ерда асосий мезонларга тўғри келмайдиган, ҳаётий зарурият бўладиган ҳолатларда махсус комиссиянинг тўғридан-тўғри топшириғига асосан Адлия вазирлигининг ўзида ҳам стикерлар расмийлаштириб берилади.
«Бу – алоҳида ҳолларда. Масалан, тўқимачилик саноати корхоналарида бугунги кунда ниқоб ишлаб чиқариляпти. Ниқоб ишлаб чиқарилишини тўхтатмаслик учун Тошкент шаҳрида жойлашган бўлса, бирга ишлаб, энг минимал равишда ходимларни ишдан олиб бориб, олиб келишда зарур бўлган хизмат машиналарига индивидуал равишда рухсат беряпмиз. Ана шундай ҳолатлар учун Адлия вазирлигида бу штабни ташкил қилганмиз», – деган Русланбек Давлетов.
Аввалроқ Адлия вазири стикер олмоқчи бўлган «иномарка»лар очиқланиши айтилгандан сўнг 9 мингга яқин ариза қайтариб олинганини маълум қилганди.
Эслатиб ўтамиз, Ўзбекистонда 30 март куни соат 06:00 дан шахсий транспортдан фойдаланишга чеклов қўйилди. Фақат Давлат хизматлари марказлари томонидан бериладиган махсус рухсатнома (стикер)га эга автотранспорт воситалари ҳаракатланишига рухсат берилди.
Автомашинасини тегишли тартибда олинган рухсатнома стикерисиз бошқарган ҳайдовчилар базавий ҳисоблаш миқдорининг 20 бараваридан 30 бараваригача, мансабдор шахслар эса 30 бараваридан 50 бараваригача миқдорда жаримага тортилиши белгиланди. Тошкентда 1 апрелдан бошлаб махсус рухсатномасиз автомобиль бошқараётганларга қарши қўшма рейд бошланди.
Изоҳ (0)