Махсус авиарейс билан 18 март куни Мисрдан Навоий шаҳрига олиб келинган 181 нафар Ўзбекистон фуқароси 2 апрель куни карантин муддатини тугатди ва ўз уйларига кузатилди. Бу ҳақда Навоий вилояти ҳокимлиги ахборот хизмати «Дарё»га маълум қилди.
Хабар берилишича, Кармана тумани ҳудудидаги Навоий кон-металлургия комбинатига қарашли соғломлаштириш марказида давом этган 14 кунлик карантинда бўлган фуқаролар билан бирга 22 нафардан иборат шифокорлар гуруҳи ҳам навбатдаги таътилга чиқарилди.
Ҳокимликнинг қайд этишича, икки ҳафта давом этган карантин даврида кузатувга олинганлар белгиланган муддатда зарур тиббий муолажалар, шахсий гигиена ва ҳимоя воситалари ҳамда озиқ-овқат маҳсулотлари билан узлуксиз таъминланди. Кузатув ва карантин даврида уларнинг бирортасида касаллик аломатлари аниқланмади. Барчаси соғлом ва яхши кайфиятда.
Маълум қилинишича, айни пайтда Навоий вилоятидаги 8 та сиҳатгоҳда 529 нафар фуқаро умумий карантин назоратига олинган. Бундан ташқари, 2808 нафар фуқаро уй карантинда шифокорлар назоратида турибди.
Ҳокимликнинг билдиришича, коронавирус инфекцияси аниқланиб, Навоий шаҳрида даволанаётган икки нафар фуқаро (она ва ўғил) Навоий вилоятига Тошкент шаҳридан меҳмон сифатида келган. Ана шу пайтда уларда касаллик белгилари борлиги аниқланиб, карантинга олинган ва шифохонага ётқизилган. Ҳар иккала бемор ҳам Тошкент шаҳри Бектемир туманида доимий яшаб келган.
Аввалроқ Латвия ва Эрондан қайтарилган фуқаролар Наманганда карантин муддатини ўтаб, ўз уйларига қайтгани ҳақида хабар берилган эди.
Изоҳ (0)