Бош давлат санитария инспектори Нурмат Отабеков АОКА ҳузуридаги штабда бўлиб ўтган брифингда Ўзбекистонга бир ой олдин хориждан қайтган фуқароларни карантинга олиш мумкин эмаслигини маълум қилди.
«Агар мазкур шахс бир ой олдин Беларусдан қайтган бўлса унинг карантинда бўлиши шарт эмас. Карантин коронавирус инфекцияси бўйича эпидемик жиҳатдан нохуш вазият бўлган мамлакатдан қайтган ёки коронавирус юқтирган бемор билан мулоқотда бўлган шахсларга нисбатан қўлланилади. Иккала ҳолатда ҳам 14 кунлик мажбурий карантинга олиш белгиланган», – дея таъкидлаган Отабеков.
Нурмат Отабеков 14 кунлик карантинга олинган фуқароларнинг ушбу муддат якунланганидан кейин ушбу жойга бошқа гуруҳнинг қай тартибда жойлаштирилиши ҳақида ҳам гапирган.
«Бир маротаба жойлаштирилган 14 кунлик карантинни ўтаб бўлмагунига қадар, бошқа гуруҳлар ёки шахслар улар орасига қўшилмайди. Карантиндагилар чиқиб кетганидан кейин, ушбу муассасаларда дастлаб дезинфекция воситалар билан ишлов берилади, маълум вақт экспозиция қилингандан сўнг, яхшилаб тозаланади ва кейин бошқа гуруҳ жойлаштирилиши мумкин», – деган Отабеков.
Ўзбекистонда коронавирусга чалинганлар сони 31 март ҳолатига кўра, 172 нафарга етган. 1 апрелдан бошлаб боғча тарбияланувчилари учун телевизион машғулотлар эфирга узатилади. 31 мартга қадар эпидемияга қарши курашиш қоидаларини бузган 289 киши 100 миллион сўмдан ортиқ жаримага тортилган.
Изоҳ (0)