Ижтимоий тармоқларда «Korzinka.uz» супермаркетлар тамоғида картошка 18 минг сўмдан, гўшт 84 минг сўмдан сотилаётгани ҳақидаги хабарлар тарқалди. Компания раҳбари Зафар Ҳошимов ўзининг Facebook’даги саҳифасида ушбу хабарларга муносабатини ёзиб қолдирди.
Унинг айтишича, бу ваҳимали хабарларнинг ҳеч бирида холислик ва ҳақгўйлик йўқ, уларни тарқатган шахслар одамлар асаби торлигидан фойдаланиб, ўзини пиар қилиш билан овора.
«Улар бу амалларини қасддан қилган, дейишимнинг боиси, кичкина рангсиз 3 сантиметр х 7 сантиметр нархномаларни кўриб, катта А4 форматдаги сап-сариқ нархномани кўрмасликнинг асло имкони йўқ», — дейди у.
«Наҳотки 83 990 сўмлик антрекот расмини олган инсон, ёнидаги 48 990 сўмлик чиройли мол гўштининг расмини кўрмаган бўлса ёки 17 990 сўмлик яп-янги ёш картошкани суратга олиб, уни достонларга тушираётган инсонлар, майли, баррача ёш картошканинг фарқига боришмас, лекин қандай қилиб, тоғ бўлиб уйилиб ётган 3 500 сўмлик картошкани пайқамай ўта олишган экан?», — деган Зафар Ҳошимов ва одамларни бундай фитна-найрангларга учмасдан, ҳушёр бўлишга чақирган.
Эслатиб ўтамиз, ижтимоий тармоқларда бананлар орқали коронавирус юқиши мумкинлиги ҳақида гап-сўзлар тарқалгач, унинг савдоси уч баробарга тушиб кетганда Зафар Ҳошмов бундай ёлғон маълумот тарқатмасликни, бананлар Хитойда эмас, Эквадорда етиштирилиб, Атлантика океани орқали Болтиқ денгизи портларига, у ердан Тошкентга олиб келинишини айтганди.
Изоҳ (0)