Yarim oydan ortiq koronavirus bilan yashayotgan Toshkent — suratlarda

15-mart kuni Respublika virusologiya instituti laboratoriyasida Fransiyada bo‘lib qaytgan O‘zbekiston fuqarosida COVID-19 koronavirus infeksiyasi aniqlangan edi.

Respublikada koronavirus tufayli karantin e’lon qilindi. 16-martdan xorijiy davlatlar bilan barcha aviareyslar bekor qilindi. O‘zbekistonga koronavirusning kirib kelishi va tarqalishining oldini olish yuzasidan chora-tadbirlar dasturini tayyorlash bo‘yicha respublika maxsus komissiyasi qaroriga muvofiq, 22-martdan Toshkentda jamoat transporti harakati to‘xtatilgan. 30-martdan esa shaxsiy transportdan foydalanishga cheklov qo‘yilishi ma’lum qilindi.

Shuningdek, zarur bo‘lmagan hollarda ayrim toifadagi aholining uyidan tashqariga chiqmasligi, chiqqan taqdirda ham shaxsiy himoya vositalari (niqob)da bo‘lishi tavsiya etilgan edi. Keyinchalik maxsus komissiya qaroriga ko‘ra, 27-martdan boshlab barcha fuqarolarga zarurat bo‘lmaganda ko‘chaga chiqish taqiqlangan. Ular dori-darmon yoki oziq-ovqat mahsulotlarini xarid qilish uchungina tashqariga chiqishi mumkin.

31-mart holatiga ko‘ra, O‘zbekistonda koronavirusga chalinganlar soni 167 nafarga yetgan.

“Daryo” muxbiri Toshkentning ayrim ko‘chalarida bo‘lib, kiritilgan o‘zgarishlar shahar aholisi hayotida qanday aks etganini fotolavhalarga muhrladi.

Shaxsiy transportdan foydalanishga cheklov qo‘yilganidan boshlab ko‘chalar tez-tez huvullab qolmoqda.

Shaxsiy avtomobillar va jamoat transportlariga qo‘yilgan cheklovdan so‘ng shahar ko‘chalarida boshqa transport vositalari faollashdi.

Davlat xizmatlari markazlari tomonidan beriladigan maxsus ruxsatnoma (stiker)lar asosida harakatlanayotgan avtotransport vositalari. 

27-martdan boshlab fuqarolar zarurat bo‘lmaganda ko‘chaga chiqishi taqiqlangan. Ular dori-darmon yoki oziq-ovqat mahsulotlarini xarid qilish uchun chiqishmoqda.

Taqiq va cheklovlardan ko‘proq jonivorlar manfaat ko‘rayotgani aniq.

Toshkent shahrining turli tumanlari, burchaklarida joylashgan chiqindixonalar, chiqindi qutilari esa bo‘sh holatda uzoq qolmoqda.

Tibbiyot niqoblari va chiqindilar esa hamon beparvolarcha istalgan joyga tashlab ketilmoqda.

Davlat xizmatlari agentligiga kelayotgan odamlar oqimi esa kamaymadi.