Тошкентда коронавирус сабабли аҳоли ўртасида ваҳима келиб чиққанидан сўнг картошка истеъмоли кескин ортди. Бу ҳақда Тошкент шаҳар ҳокимининг биринчи ўринбосари Ҳотамбек Шокиров Халқаро пресс-клубнинг коронавирус мавзусига бағишланган навбатдаги сессиясида маълум қилди.
Унинг айтишича, илгари пойтахт аҳолиси бир кунда максимал даражада 100 тонна картошка истеъмол қилган, ҳозир эса унга бўлган талаб 150 тоннага етган.
«Картошка ваҳимаси бошланган вақтдан эса бир кунда уч кунлик картошка истеъмол қилинмоқда. Шундай бўлса ҳам бизда картошка етказиб бериш билан боғлиқ муаммо бўлмаяпти», — деган у.
Шунингдек, унинг қўшимча қилишича, Тошкент аҳолиси бир кунда 50 тонна гўшт маҳсулотларини истеъмол қилмоқда. Улардан 30 тоннаси мол гўштидир.«Одамларимиз бирор маҳсулотни сотиб олиш учун навбатда турганлар қаторини кўриб, ўша маҳсулотни режалаштирганларидан кўра кўпроқ сотиб олмоқда», — дейди Ҳотамбек Шокиров.
Аввалроқ Тошкент шаҳар ҳокимлиги бозорлардаги навбатларга муносабат билдириб, озиқ-овқат танқислиги бўлмаслигини маълум қилганди. Қишлоқ хўжалиги вазирлиги ҳам қишлоқ хўжалиги маҳсулотлари етишмовчилиги бўлмаслигини билдирган.
Изоҳ (0)