Месси «Барселона» футболчилари маошининг 70 фоизидан воз кечишини маълум қилди

«Барселона» сардори Лионель Месси коронавирус пандемияси сабаб жамоа футболчиларининг маоши камайтирилиши ҳақида маълум қилди.

Мессининг таъкидлашича, футболчилар маошларининг 70 фоизгача қисқаришига рози бўлган. Шу билан бирга ўйинчилар «Барселона»нинг қолган ходимлари маошини тўлиқ олиши учун пул ўтказиб беради.

«Мана шу осон бўлмаган пайтларда «Барселона» атрофида маошлар билан боғлиқ турли гап-сўзлар бўлди. Шуни маълум қилишим керак, ҳар биримиз маошнинг камайтирилишини хоҳладик, чунки бу ҳолат (коронавирус) издан чиқиб кетмоқда.

Клуб ёрдам сўраса футболчилар биринчилардан бўлиб бу ишни бажариши керак. Футболчилар бунга тайёр эди. Бироқ клуб ичидаги баъзи бировлар бизни ноқулай ҳолатга тушириш ва босимни кўпайтиришга уринди, бу эса бизни ҳайрон қолдирди.

Аслини олганда, келишувнинг бир неча кун ортга сурилганига сабаб шуки, биз клуб ва унинг ходимларига бу қийин кунларда ёрдам беришнинг энг яхши йўлларини қидирдик.

Инқироз вақтида футболчилар 70 фоиз маошидан воз кечишдан ташқари клубнинг қолган ходимлари маошини тўлиқ олиши учун махсус ўтказмалар амалга оширамиз.

Буни шу вақтга қадар эълон қилмаганимизга ягона сабаб: клубга ҳақиқатда ёрдам бера оладиган қарорни изладик», — дейилади баёнотда.

Мессининг ушбу мурожаати бир оз вақт ўтгач «Барселона»нинг қолган бир қатор футболчилари саҳифасида пайдо бўлди.

Эслатиб ўтамиз, аввалроқ «Барселона» футболчиларнинг маошини 70 фоизгача қисқартирмоқчи экани, бироқ айрим ўйинчилар бунга қарши чиқаётгани ҳақида хабарлар янграганди.