Бухоро давлат тиббиёт институтида карантин сабаб ўз юртига қайтолмаган хорижлик талабалар учун онлайн дарслар бошланди. Бу ҳақда «Дарё»га институт ректори Амрилло Иноятов маълум қилмоқда.
Онлайн дарслар жорий йилнинг 26 март кунидан бошланган бўлиб, машғулотларда ўз хоҳишига кўра институт ётоқхонасида қолган 287 нафар талаба иштирок этмоқда.
Мавзуга доир: Халқ таълими вазирлиги карантин вақтида ўқувчилар учун намойиш этиладиган видеодарслар бўйича тушунтириш берди
«Биз Ҳиндистондан Абу Али ибн Сино юртига таҳсил олишга келганмиз. Айнан пандемия вақтида эса биз учун ҳам профилактик тадбирлар кучайтирилган. Хонамиз ҳар кун дезинфекцияланиб, шифокорлар тун-у кун биз билан бирга. Дарслардан ҳам узилиб қолмаяпмиз. Zoom дастури йўналишида онлайн машғулотлар инглиз, рус ва ўзбек тилларида олиб борилмоқда. Институт профессорларининг маъруза ва тақдимотларини мобил телефон ва компьютер орқали кузатиб боряпмиз», — дейди ҳиндистонлик Тарун Гангурде Прадеер.
Олийгоҳ томонидан талабаларга 16 турдаги озиқ-овқат маҳсулотлари етказиб берилган. Тиббиёт хонаси зарур дори воситалари билан таъминланган.
Маълум қилинишича, институтда Туркманистон, Қозоғистон, Қирғизистон, Тожикистон, Беларусь, Покистон, Ҳиндистон, Россия, Озарбайжон, Афғонистон ва Украина давлатларидан жами 309 нафар талаба таҳсил олади. Шулардан 244 нафари туркман талабалари бўлса, 43 нафари ҳиндистонлик талабалардир. Ҳозирда карантин сабаб 1238 нафар хорижлик талаба Бухорода қолган.
Изоҳ (0)