Қашқадарёлик тадбиркор 3 тонна сабзавот маҳсулотлари ва 3 минг дона тиббиёт ниқобини аҳолига бепул тарқатди. Бу ҳақда Деҳқонобод туман ҳокимлиги берган маълумотга таяниб, «Дарё» мухбири хабар бермоқда.
Маълум бўлишича, Деҳқонобод туманидаги «Муҳаммад ота» хусусий корхонаси раҳбари Суннат Жўраев карантинда ижтимоий аҳволи оғир бўлган фуқароларни қўллаб-қувватлаш мақсадида уларга кўмак беришга ҳаракат қилмоқда.
«Бугун 3 тонна картошка, сабзи ва пиёз тарқатдик. Насиб этса бу ишимизни давом эттирамиз ва юртдошларимизни қўллаб-қувватлаймиз», — дейди тадбиркор.
Таъкидланишича, тадбиркор томонидан аҳолига 3 минг дона тиббиёт ниқоби ҳам тарқатилган.
Деҳқонобод туман ҳокими ўринбосари Жасур Равшановнинг маълумот беришича, туманда фаолият юритувчи тадбиркорлар тумандошларини қўллаб-қувватлаш мақсадида аҳолига ёрдам беришга ҳаракат қилмоқда.
«Ҳар куни тадбиркорлардан бири ташаббус билан чиқаётгани қувонарли. Бири картошка тарқатса, бири ниқоб тарқатяпти. Яна бири эса ҳўкиз сўйиб аҳолига бепул гўшт улашмоқда», — дейди Жасур Равшанов.
Мавзуга доир:
Изоҳ (0)