Buxoro davlat tibbiyot institutida karantin sabab o‘z yurtiga qaytolmagan xorijlik talabalar uchun onlayn darslar boshlandi. Bu haqda “Daryo”ga institut rektori Amrillo Inoyatov ma’lum qilmoqda.
Onlayn darslar joriy yilning 26-mart kunidan boshlangan bo‘lib, mashg‘ulotlarda o‘z xohishiga ko‘ra institut yotoqxonasida qolgan 287 nafar talaba ishtirok etmoqda.
Mavzuga doir: Xalq ta’limi vazirligi karantin vaqtida o‘quvchilar uchun namoyish etiladigan videodarslar bo‘yicha tushuntirish berdi
“Biz Hindistondan Abu Ali ibn Sino yurtiga tahsil olishga kelganmiz. Aynan pandemiya vaqtida esa biz uchun ham profilaktik tadbirlar kuchaytirilgan. Xonamiz har kun dezinfeksiyalanib, shifokorlar tun-u kun biz bilan birga. Darslardan ham uzilib qolmayapmiz. Zoom dasturi yo‘nalishida onlayn mashg‘ulotlar ingliz, rus va o‘zbek tillarida olib borilmoqda. Institut professorlarining ma’ruza va taqdimotlarini mobil telefon va kompyuter orqali kuzatib boryapmiz”, — deydi hindistonlik Tarun Gangurde Pradeer.
Oliygoh tomonidan talabalarga 16 turdagi oziq-ovqat mahsulotlari yetkazib berilgan. Tibbiyot xonasi zarur dori vositalari bilan ta’minlangan.
Ma’lum qilinishicha, institutda Turkmaniston, Qozog‘iston, Qirg‘iziston, Tojikiston, Belarus, Pokiston, Hindiston, Rossiya, Ozarbayjon, Afg‘oniston va Ukraina davlatlaridan jami 309 nafar talaba tahsil oladi. Shulardan 244 nafari turkman talabalari bo‘lsa, 43 nafari hindistonlik talabalardir. Hozirda karantin sabab 1238 nafar xorijlik talaba Buxoroda qolgan.
Izoh (0)