Зафар Ҳошимов «Korzinka.uz» супермаркетларига энди навбат билан кирилиши, харидорлар масофа сақлаб маҳсулот олишини эълон қилди

«Korzinka.uz» супермаркетларга киришни чекламоқда. Бу ҳақда компания раҳбари Зафар Ҳошимов Facebook’даги саҳифасида маълум қилди.

Зафар Ҳошимовнинг сўзларига кўра, тармоқдаги барча супермаркетларга харидорларнинг катта оқими кириши кузатилмоқда. Вазият бошқача бўлганида, яъни бошқа даврда бундай ажиотаж кузатилса, компаниядагилар жуда хурсанд бўларди:

«Тушунаман, 30 мартдан шахсий автомобилда шаҳар бўйлаб ҳаракатланиш қийин бўлади. Эртадан бозорлар ва супермаркетлар ишламаслиги ҳақида миш-мишлар тарқалганини ҳам биламан, бу ёлғон ва дезинформация. Маркетлар ва бозорлар ёпилмайди», — деб ёзган тадбиркор.

Зафар Ҳошимов компаниянинг нафақат харидорларга кўрсатилаётган хизматлар учун, балки уларнинг хавфсизлиги учун, шунингдек, ходимлар муҳофазаси учун ҳам масъул эканини билдирган.

«Шу сабабли биз ташриф буюрувчилар оқимини тезкорлик билан камайтириш мақсадида одамларнинг савдо заллари ва касса ҳудудларида масофани сақлаши учун керакли чораларни амалга оширдик», — дея ёзган «Korzinka.uz» раҳбари.

Супермаркетларга кириш вақти ҳам чегаралаб қўйилган.

Компания барча ташриф буюрувчилардан бир-бирларидан масофа сақлаган ҳолда навбатда туришни илтимос қилган. Харид қилиш учун келган янги мижозлар супермаркетларда хавфсиз ҳаракатланиш учун етарли даражада бўш майдон бўлганида ичкарига киритилади.

«Бизнинг ушбу чеклов меъёрларимизни тўғри тушунишингизни сўрайман. Ушбу чоралар бизнес учун ҳам, биз учун ҳам ёқимли ва манфаатли эмас, бироқ бугун биз учун соғлиқ, хавфсизлик ва фаровонлик барчасидан муҳимроқ», — дейилади Зафар Ҳошимовнинг Facebook’даги саҳифасида ёзилган постда.

Шунингдек, у одамларнинг супермаркетларда ўзлари ва атрофдагилар соғлиғини хавф остига қўйиб тўпланаётганига жим қараб тура олмаслигини таъкидлади.

«Соғлом фикрлайдиган барча инсонлар ушбу чораларимиз вақтинча эканини ва бундай паллада бирлашиш лозимлигини тўғри тушунишига умид қиламан», — дея сўзларига якун ясаган Ҳошимов.

Ҳошимов постига супермаркетлардаги вазият ҳақида фотосуратлар ва видео ҳам илова қилган.

https://www.facebook.com/zkhashimov/videos/10217102276649662/