ХТВ 30 мартдан бошланадиган телевизион дарслар жадвалларини эълон қилди

Халқ таълими вазирлиги Ўзбекистон Миллий телерадиокомпанияси билан ҳамкорликда 30 март, душанба кунидан эътиборан учта телеканалда телевизион дарслар намойишини бошлайди. Бу ҳақда вазирлик ахборот хизмати хабар қилган.

Uzdigital TV абонентлари 1—4-синфлар учун телевизион дарсларни National Geography Wild каналида, 5—8-синфлар учун Eurosport каналида, 9—11-синфлар учун эса «Охота и рибалка» каналида томоша қилиши мумкин.

«Ўзбекистон Кабель телевидениеси» ва IP-телевидение абонентларида эса телевизион дарслар бошқа телеканаллар ўрнига намойиш этилиши мумкин.

Шунингдек, видеодарслар Ер сунъий йўлдоши орқали узоқ ва бориш қийин аҳоли пунктларида ўрнатилган кам қувватли телеузаткичлар орқали қўшимча каналлар шаклида 4 та телевизион канал орқали очиқ ҳолда бепул асосда тарқатилиши ташкиллаштирилди.

Агар абонентларда савол ёки муаммолар юзага келса, улар телевидение хизматларини тақдим этувчи компанияларга мурожаат этиши мумкин.

Халқ таълими вазирлиги ҳар ҳафта телевизион дарслар эфир вақти ҳақидаги маълумотларни ўзининг расмий сайти («www.uzedu.uz») ва ижтимоий тармоқларидаги саҳифаларида эълон қилиб боради.

Видеодарслар интернет тармоғидаги қуйидаги манбаларда ҳам жойлаштириб борилади:

TAS-IX тармоғида: https://mover.uz/channel/uzeduuz/

TAS-IX тармоғидан ташқарида:

https://youtube.com/c/O-zbekistonRespublikasiXalqtalimivazirligi

ҳттпс://т.ме/узедуонлинемактаб

Телевизион дарслар 100 дан ортиқ педагоглар иштирокида тасвирга олинган. Улар орасида давлат мукофоти соҳиблари, дарсликлар муаллифлари, йилнинг энг яхши фан ўқитувчилари кўпчиликни ташкил этади. Халқ таълими вазири Шерзод Шерматовнинг сўзларига кўра, 700 дан ортиқ телевизион дарслар ёзиб олинган.

Эслатиб ўтамиз, коронавирус сабаб Ўзбекистондаги барча мактаблар, боғчалар ва ОТМлар 16 мартдан бошлаб карантинга ёпилганди.