Хитойнинг Alibaba Foundation хайрия жамғармаси ва ушбу интернет-компания асосчиларидан бири ҳисобланган Жек Манинг фонди коронавирусга қарши кураш учун етти мамлакатга, хусусан, Ўзбекистонга ёрдам юкларини юборади, дея хабар бермоқда «Gazeta.uz».
Businesswire хабарига кўра, тиббий ёрдам юкларини Ўзбекистондан ташқари Озарбайжон, Қозоғистон, Қирғизистон, Ҳиндистон, Вьетнам ва Бутан олади.
Ушбу етти мамлакат умумий ҳисобда 1,7 миллион дона юз ниқоби, COVID-19 коронавирусини аниқлаш имконини берадиган 165 мингта тест тўплами, тиббий ҳимоя либослари ва тиббиёт ускуналарини, жумладан, пешона термометрлари ва сунъий нафас олдириш аппаратларини қабул қилиб олади.
Тиббий ёрдамнинг дастлабки рейси Ҳиндистонга учиб кетган. Ўзбекистон ва бошқа мамлакатларга яқин вақт ичида Хитойдан самолётлар келади.
Аввалроқ Alibaba Foundation ва Жек Ма фонди коронавирусга қарши кураш мақсадида бошқа давлат ва минтақаларга, хусусан, Жанубий Шарқий Осиё, Европа Иттифоқи мамлакатларига, шунингдек, АҚШга ёрдам юборган эди.
Ушбу фондлар Хитой, Питер Доэрти номидаги Инфекциялар ва иммунитет институти (Австралия) ҳамда Колумбия университети (АҚШ)даги коронавирусни даволаш бўйича тадқиқот ва ишланмаларни ҳам молиялаштирмоқда.
Аввалроқ Ўзбекистон Россия, Хитой ва Сингапур каби мамлакатлардан 300 мингта экспресс-тест ва 500 та сунъий нафас олдириш аппарати харид қилиши кутилаётгани ҳақида хабар берилган эди. Маълумот учун, Ўзбекистонда 29 март Тошкент вақти билан соат 17:00 ҳолатига кўра, 133 киши касалланган, икки киши вафот этган, етти киши соғайган.
Изоҳ (0)