Тошкентда коронавирусга қарши курашаётган шифокорларнинг бир гуруҳи ўрин алмашди. Шифохонани тарк этганлар 14 кунга изоляция қилинади

Тошкентдаги Вирусология илмий-текшириш институти клиникасида икки ҳафта давомида коронавирус инфекциясига қарши курашган бир гуруҳ тиббиёт ходимлари 29 март куни, соғлиқни сақлаш вазири Алишер Шодмонов иштирокида, юксак эҳтиром билан кузатилди.

«Эндиликда улар ўрнида тиббиёт ходимларининг навбатдаги гуруҳи фаолият бошлашади. Ўз навбатида, шифохонани тарк этган тиббиёт ходимлари 14 кун давомида изоляция қилинади», — дея хабар бермоқда Соғлиқни сақлаш вазирлиги матбуот хизмати.

Президент Мирзиёев коронавирус билан боғлиқ вазият юзасидан Ўзбекистон халқига қилган иккинчи мурожаатида «ўз ҳаёти ва соғлигини гаровга қўйиб, пандемия билан курашаётган шифокорлар, ҳамширалар, санитар ходимларга» бутун Ўзбекистон номидан чексиз миннатдорлик билдирган эди.

Қайд этиш жоиз, коронавирусдан зарарланган беморлар билан мулоқотда бўладиган, беморлар жойлаштирилган объектларда ҳамда коронавирусни аниқлаш лабораторияларида фаолият олиб бораётган тиббиёт, санитария-эпидемиология хизмати ва бошқа ходимларга ҳар 14 кунлик фаолият даври учун Президент томонидан махсус қўшимча рағбатлантириш тўлови белгиланган.

Унга кўра, врач ходимларга, врач-лаборантларга — 25 миллион сўм; ўрта тиббиёт ходимларига, ҳамшира-лаборантларга — 15 миллион сўм; кичик тиббиёт ходимларига — 10 миллион сўм; бошқа ходимларга — 5 миллион сўм. Шунингдек, беморлар билан ишлаш давомида коронавирус инфекциясини юқтириб олган тиббиёт, санитария-эпидемиология хизмати ва бошқа ходимларга 100 миллион сўм тўланади.

Шунингдек, коронавирус инфекциясига қарши курашиш доирасида беморлар билан ишлаган вақтида коронавирус инфекциясини юқтириш натижасида оғир аҳволга тушган ва соғлиғи тикланмаган тақдирда тиббиёт, санитария-эпидемиология хизмати ва бошқа ходимларга ёки уларнинг оила аъзоларига эса 250 миллион сўм миқдорида бир марталик тўловлар тўланади.

Маълумот учун, 29 март Тошкент вақти билан соат 16:00 ҳолатига Ўзбекистонда 133 кишида коронавирус аниқланган, уларнинг икки нафари вафот этган, етти нафари соғайган. Аввалроқ касалланганларнинг камида 11 нафари Вирусология илмий-текшириш институти ходимлари экани айтилган эди. Қайд этиш жоиз, Ўзбекистонда коронавирус аниқланган биринчи бемор ва касалликнинг иккинчи қурбони шифокор эди.